អូស្រ្តាលីបារម្ភខ្លាំង! បុរសឆ្លងវីរុសបំប្លែងខ្លួនឥណ្ឌា ចូលទស្សនាបាល់ឱបក្នុងពហុកីឡដ្ឋានផ្ទុកមនុស្សជាង២ម៉ឺននាក់

ទីក្រុងធំបំផុតទី២របស់ប្រទេសអូស្រ្តាលី អាចនឹងត្រូវបិទខ្ទប់ ដោយសារតែការរីករាលដាលនៃវីរុសបំប្លែងខ្លួនឥណ្ឌា។

នៅថ្ងៃនេះ ទីក្រុង Melbourne បានដាក់ការរឹតត្បិតមួយចំនួនឡើងវិញ ខណៈអាជ្ញាធរបានរាយការណ៍ពីករណីថ្មីនៃវីរុសកូវីដ-១៩បំប្លែងខ្លួនឥណ្ឌាចំនួន ៥ករណី។

ទីក្រុងនេះ ត្រូវបានដាក់ក្នុងការប្រុងប្រយ័ត្នខ្ពស់ បន្ទាប់ពីបុរសឆ្លងមេរោគម្នាក់ បានអង្គុយក្នុងចំណោមអ្នកគាំទ្រចំនួន២៣,០០០នាក់ អំឡុងការប្រកួតបាល់ឱបលីគអូស្រ្តាលី កាលពីរាត្រីថ្ងៃអាទិត្យនៅឯពហុកីឡដ្ឋាន Melbourne Cricket Ground (MCG) ក្នុងរដ្ឋ Victoria។

ចង្កោមនៃការផ្ទុះមេរោគបំប្លែងខ្លួនឥណ្ឌាចំនួន៩ករណី​ ត្រូវបានគេកត់ត្រានៅតំបន់ជាយក្រុង Melbourne ភាគខាងជើង ក្នុងរយៈពេលពីរថ្ងៃកន្លងមកនេះ ខណៈក្រុមអ្នកជំនាញបារម្ភថា ការផ្ទុះឡើងអាចនឹងរីករាលដាលបន្ថែមទៀត។

ក្នុងចំណោមករណីទាំង៥នៃវីរុសឥណ្ឌាដែលត្រូវបានកត់ត្រាក្នុងទីក្រុង ករណីទាំងអស់សុទ្ធតែពាក់ព័ន្ធទៅនឹងបុរសអាយុ៦០ឆ្នាំម្នាក់ ដែលបានចម្លងវីរុស ទៅមនុស្ស៤គ្រួសារ។

រឿងនេះ បានជំរុញឲ្យមានការវិលត្រឡប់ទៅរកការរឹតបន្តឹងឡើងវិញនៅក្នុងទីក្រុង រួមទាំងការពាក់ម៉ាស់នៅក្នុងកន្លែងបិទជិត និងនៅតាមមធ្យោបាយដឹកជញ្ជូនសាធារណៈ និងការកំណ ភ្ញៀវចំនួនប្រាំនាក់នៅក្នុងផ្ទះផងដែរ។

អាជ្ញាធររដ្ឋ Victoria បានចេញបញ្ជាឲ្យពាក់ម៉ាស់ជាចាំបាច់នៅឯកន្លែងបិទជិត និងរឹតត្បិតការជួបជុំនៅតាមផ្ទះ ប៉ុន្តែរហូតមកដល់ពេលនេះ មិនបានហាមឃាត់អ្នកទស្សនានៅក្នុងព្រឹត្តិការណ៍កីឡានោះទេ។

Victoria គឺជារដ្ឋដែលរងគ្រោះខ្លាំងជាងគេបំផុតក្នុងអំឡុងរលកទី២ កាលពីចុងឆ្នាំមុន ដោយមានប្រហែល៧០ភាគរយនៃករណីសរុប និង៩០ភាគរយនៃការស្លាប់របស់អូស្ត្រាលី៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ្នកវិទ្យាសាស្ត្រអូស្រ្តាលី ផលិតថ្នាំ២ប្រភេទ ដែលអាចទប់ស្កាត់ការឆ្លងកូវីដ និងបញ្ឈប់ការរាលដាល