ចិន អនុម័តច្បាប់ ប្រឆាំង ទណ្ឌកម្មបរទេស

ប្រទេសចិន បានអនុម័តច្បាប់មួយដើម្បីប្រឆាំងនឹងទណ្ឌកម្មបរទេស ស្របពេលប្រទេសនេះ ព្យាយាមគេចវេះពីសម្ពាធ ដែលដាក់ដោយសហរដ្ឋអាមេរិកនិងសហភាពអ៊ឺរ៉ុប ជុំវិញវិស័យពាណិជ្ជកម្ម បច្ចេកវិទ្យា បញ្ហាហុងកុងនិងស៊ីនជាំង។

យោងតាមទូរទស្សន៍រដ្ឋ CCTV បានឲ្យដឹងថា សភាប្រជាជនចិន (NPC) បានអនុម័តច្បាប់នេះកាលពីថ្ងៃព្រហស្បតិ៍ ប៉ុន្តែព័ត៌មានលម្អិតនៃខ្លឹមសាររបស់វា មិនទាន់ត្រូវបានចេញផ្សាយនៅឡើយទេ។

ច្បាប់ថ្មីនេះ គឺជាឧបករណ៍ច្បាប់ចុងក្រោយនិងទូលំទូលាយបំផុតរបស់ប្រទេសចិន ដើម្បីឆ្លើយតបទៅនឹងទណ្ឌកម្មបរទេស ហើយក្រុមអ្នកជំនាញក្នុងតំបន់បាននិយាយថា វាមានគោលបំណងធ្វើឲ្យវិធានការសងសឹករបស់ចិន កាន់តែមានភាពស្របច្បាប់។

ទោះបីជាយ៉ាងណាក៏ដោយ ក្រុមហ៊ុនបរទេសនានា មានក្តីព្រួយបារម្ភអំពីផលប៉ះពាល់នៃច្បាប់នេះ ចំពោះការវិនិយោគបរទេស។

សហរដ្ឋអាមេរិកនិងសម្ព័ន្ធមិត្តរបស់ខ្លួន បានដាក់ទណ្ឌកម្មកាន់តែច្រើនឡើងៗ ដល់មន្រ្តីចិន ដើម្បីសម្តែងការព្រួយបារម្ភអំពីរបៀបដែលចិនប្រព្រឹត្ត ចំពោះជនជាតិភាគតិចមូស្លីមអ៊ុយហ្គួរ នៅក្នុងតំបន់ស៊ីនជាំង និងសកម្មភាពគាំទ្រលទ្ធិប្រជាធិបតេយ្យនៅហុងកុង។

សហរដ្ឋអាមេរិកនិងសម្ព័ន្ធមិត្តរបស់ខ្លួន បានដាក់ទណ្ឌកម្មកាន់តែច្រើនឡើងៗ ដល់មន្រ្តីចិន ដើម្បីសម្តែងការព្រួយបារម្ភអំពីរបៀបដែលចិនប្រព្រឹត្ត ចំពោះជនជាតិភាគតិចមូស្លីមអ៊ុយហ្គួរ នៅក្នុងតំបន់ស៊ីនជាំង និងសកម្មភាពគាំទ្រលទ្ធិប្រជាធិបតេយ្យនៅហុងកុង។

ឧទាហរណ៍ អនុប្រធានចំនួន១៤រូប នៃគណៈកម្មាធិការអចិន្រ្តៃយ៍របស់ NPC បានស្ថិតនៅក្រោមការដាក់ទណ្ឌកម្មរបស់សហរដ្ឋអាមេរិក ជុំវិញការអនុម័តច្បាប់សន្តិសុខជាតិកាលពីឆ្នាំមុន ដែលអ្នករិះគន់និយាយថា បានធ្វើឲ្យប៉ះពាល់ដល់សេរីភាពនយោបាយនៅក្នុងទីក្រុងហុងកុង។

ទីក្រុងវ៉ាស៊ីនតោន ក៏បានកំណត់គោលដៅផងដែរដល់ក្រុមហ៊ុនចិន ដូចជា Huawei និង ZTE ពីបទរំលោភលើទណ្ឌកម្មរបស់សហរដ្ឋអាមេរិក លើប្រទេសអ៊ីរ៉ង់ឬកូរ៉េខាងជើង។

ប្រទេសចិន បានវាយបកវិញក្នុងរយៈពេលប៉ុន្មានខែថ្មីៗនេះ ដោយដាក់ទណ្ឌកម្មលើអ្នកនយោបាយជាន់ខ្ពស់និងមន្ត្រីមកពីសហរដ្ឋអាមេរិក សហភាពអឺរ៉ុបនិងចក្រភពអង់គ្លេស។

ក្រសួងពាណិជ្ជកម្មកាលពីខែមករា ក៏បានប្រកាសផងដែរ អំពីយន្តការដើម្បីវាយតម្លៃថាតើការរឹតត្បិតរបស់បរទេសលើសកម្មភាពពាណិជ្ជកម្មនិងជំនួញរបស់ចិន ត្រូវបានធ្វើដោយសមហេតុផល ហើយថាតើបុគ្គលឬក្រុមហ៊ុនចិនអាចប្តឹងទាមទារសំណងនៅក្នុងតុលាការចិនបានដែរឬក៏អត់៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ចិន​ប្រកាស​ដាក់​ទណ្ឌកម្ម​លើ​បុគ្គល​​អឺរ៉ុប​១០​រូប​ និង​ស្ថាប័ន​៤​