WHO ប្រកាសបញ្ចប់ជំងឺដ៏កាចសាហាវមួយនេះនៅប្រទេសហ្វីលីពីន

ការផ្ទុះជំងឺជំងឺស្វិតដៃជើងនៅប្រទេសហ្វីលីពីនបានបញ្ចប់ ។ នេះបើយោងតាមអង្គការសុខភាពពិភពលោក (WHO) និងមូលនិធិកុមាររបស់អង្គការសហប្រជាជាតិ (UNICEF) ដែលបានកោតសរសើរចំពោះកិច្ចខិតខំប្រឹងប្រែង របស់រដ្ឋាភិបាលក្នុងការប្រយុទ្ធប្រឆាំងនឹងជំងឺនេះ ទោះបីជាមានការរីករាលដាលនៃជំងឺកូវីដ ១៩ ក៏ដោយ ។

ទីភ្នាក់ងារ UN បាននិយាយនៅក្នុងសេចក្តីថ្លែងការណ៍រួមមួយ កាលពីថ្ងៃសុក្រថា ក្រសួងសុខាភិបាលហ្វីលីពីនបានបញ្ចប់ការឆ្លើយតបរបស់ខ្លួន ចំពោះការផ្ទុះឡើងនៃជំងឺស្វិតដៃជើងនៅថ្ងៃទី ៣ ខែមិថុនា បន្ទាប់ពីគ្មានករណីណាមួយត្រូវបានគេរកឃើញរយៈពេល ១៦ ខែ ក្រោយយុទ្ធនាការចាក់វ៉ាក់សាំង និងការឃ្លាំមើលយ៉ាងខ្លាំង ។

ទន្ទឹមនោះ មន្ត្រីសុខាភិបាលហ្វីលីពីនបានប្រកាសថា ជំងឺស្វិតដៃជើងបានលេចចេញជាថ្មីនៅក្នុងប្រទេស កាលពីខែកញ្ញា ឆ្នាំ ២០១៩ ពោលជិត ២ ទសវត្សរ៍ បន្ទាប់ពី WHO បានប្រកាសថា ប្រទេសអាស៊ីអាគ្នេយ៍មួយនេះ លែងមានជំងឺឆ្លង ដែលអាចបណ្តាលឲ្យខ្វិន និងស្លាប់ ។

បន្ថែមពីនេះ មន្ត្រីសុខាភិបាលរបស់រដ្ឋាភិបាល ដែលគាំទ្រដោយ WHO និង UNICEF មិនបានព្រងើយកន្តើយពីបញ្ហានេះនោះទេ ហើយបានពង្រីកយុទ្ធនាការប្រឆាំងនឹងជំងឺស្វិតដៃជើង ទោះបីមានការចាប់ផ្តើមនៃរោគរាតត្បាតកូវីដ ១៩ កាលពីឆ្នាំមុនក៏ដោយ ។

គួរបញ្ជាក់ថា មុនបញ្ចប់ជំងឺមួយនេះក៏មានការផ្ដល់វ៉ាក់សាំងជំងឺស្វិតដៃជើងប្រមាណ ៣០ លានដូសសដល់កុមារនៅទូទាំងប្រទេសហ្វីលីពីន ៕

ប្រែសម្រួលដោយ ៖ ជីវ័ន្ត

ប្រភព ៖ CNA