ព័ត៌មានអន្ដរជាតិ

ផ្ទុះការតវ៉ាឲ្យនាយករដ្ឋមន្ត្រីថៃចុះចេញរឿងគ្រប់គ្រងកូវីដ

បានផុស

៤ years មុន

នៅ

ថ្ងៃចន្ទ ១៩ កក្កដា ២០២១

ដោយ

កាលពីថ្ងៃអាទិត្យម្សិលមិញយុវជនរាប់រយនាក់បានជួបជុំគ្នានៅទីក្រុងបាំងកកដើម្បីទាមទារឲ្យលោកនាយករដ្ឋមន្ត្រីថៃ ប្រាយុទ្ធ ចាន់អ៊ូចា ចុះចេញតំណែង និងឲ្យរដ្ឋាភិបាលតទទួលខុសត្រូវចំពោះការគ្រប់គ្រងជំងឺឆ្លងកូវីដ-១៩មិនបានល្អ។

អ្នកតវ៉ាបានប៉ះទង្គិចគ្នាជាមួយប៉ូលិសដែលបានប្រើឡានទឹកបាញ់បំបែក បាញ់គ្រាប់ជ័រ និងឧស្ម័នទឹកភ្នែក។ ប៉ូលិសក៏បានដាក់រនាំងការពារនៅជុំវិញទីតាំង Ratchadamoneon Nok Avenue ដើម្បីរារាំងមិនឲ្យហ្វូងមនុស្សដើរក្បួនឆ្ពោះទៅកាន់វិមានរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប៉ះទង្គិចជាមួយប៉ូលិស មនុស្សមួយចំនួនបានរបូស ហើយតំបន់មួយនៅជិតវត្ត Wat Ratchanadda ក្បែរទីលានប្រជាធិបតេយ្យត្រូវបានរៀបចំឡើងឲ្យអ្នកស្ម័គ្រផ្នែកសុខាភិបាលជួយព្យាបាលអ្នកតវ៉ាដែលរបួស។

លោក Panusaya Sithijirawattanakul មេដឹកនាំតវ៉ាបានសរសេរលើបណ្តាញសង្គម បន្ទាប់ពីកម្លាំងប៉ូលិសបង្ក្រាបថា «រដ្ឋាភោបាលឃាតក»។

ហ្វូងមនុស្សបាននាំគ្នាដើរទៅដល់ទីតាំង Nang Loeng ដែលពួកគេបានបង្ហាញក្រណាត់លក្ខណៈរុំសាកសព និងបានដុតរូបថតលោកនាយករដ្ឋមន្ត្រី។ វេលាម៉ោង៦:៣០នាទីល្ងាច ចលនាយុវជនបានប្រកាសបញ្ចប់ការជួបជុំ។

អ្នកតវ៉ាឈ្មោះ Kanyaporn Veeratat អាយុ៣៤ឆ្នាំបាននិយាយថា ៖«រដ្ឋាភិបាលខ្សោយក្នុងការគ្រប់គ្រងស្ថានភាព ហើយបើយើងមិនធ្វើអ្វីខ្លះទេ នឹងមិនមានការប្រែប្រួលឡើយ»។

ការប្រមូលផ្តុំមនុស្សច្រើននេះបានធ្វើឡើងបំពានទៅលើបំរាមរបស់រដ្ឋាភិបាលដែលមិនឲ្យមនុស្សច្រើនជាង៥នាក់ជួបជុំគ្នានៅបាំងកកដើម្បីទប់ស្កាត់កូវីដ-១៩។

បំរាមត្រូវបានដាក់នៅខេត្តចំនួន១០ រាប់ទាំងក្រុងបាំងកក ហើយឥឡូវនេះត្រូវពន្យាពេលទៅដល់ថ្ងៃទី២ ខែសីហា ខណៈខេត្តផ្សេងៗទៀតគ្រោងនឹងដាក់បំរាមដូចគ្នាចាប់ពីថ្ងៃអង្គារ៍ស្អែក។

រហូតដល់ពេលនេះ ប្រទេសថៃមានករណីឆ្លងកូវីដ-១៩សរុបជាង ៤០៣ ០០០នាក់ និងស្លាប់៣៣៤១នាក់។

កាលពីថ្ងៃអាទិត្យម្សិលមិញ មានករណីឆ្លងថ្មីជាប់កំណត់ត្រាជាង១១០០០នាក់ ហើយកាលពីថ្ងៃសៅរ៍ ករណីស្លាប់ថ្មីច្រើនបំផុតដល់ទៅ១៤១នាក់៕

ប្រែសម្រួល៖ វីរបុត្រ
ប្រភព៖ france24