ចិន ប្រើធម៌ក្ដៅលើមន្រ្តីច្រើននាក់ដែលបរាជ័យការទប់ស្កាត់ វីរុសបំប្លែងខ្លួនឥណ្ឌា Delta

ប្រទេសចិនបានដាក់ទណ្ឌកម្មលើមន្រ្តីជាច្រើនរូប ដែលបរាជ័យក្នុងការទប់ស្កាត់ការរីករាលដាលនៃជំងឺកូវីដ ១៩ ដែលបង្កឲ្យមានការឆ្លងជិត ៩០០ ករណីនៅទូទាំងប្រទេសក្នុងរយៈពេលតិចជាងមួយខែ ។

ការកើតឡើងវិញនៃករណីឆ្លងថ្មីនេះ ក៏កំពុងមានការវាយលុកពីវីរុសបំប្លែងខ្លួនឥណ្ឌា “Delta” ផងដែរ ហើយវាកំពុងធ្វើឲ្យស្មុគស្មាញដល់យុទ្ធសាស្ត្ររបស់ទីក្រុងប៉េកាំង ក្នុងការការពារមេរោគនេះ ។

ទន្ទឹមនោះ ទីក្រុង Yangzhou ភាគខាងកើតប្រទេសចិន បានចេញការព្រមានដល់មន្រ្តី ៥ រូបចំពោះការធ្វើតេស្តទ្រង់ទ្រាយធំដោយមិនត្រឹមត្រូវ ដែលពួកគេនិយាយថា អនុញ្ញាតឲ្យវីរុសបន្តរីករាលដាល ។

ទីក្រុងនេះបានវ៉ាដាច់ទីក្រុង Nanjing ដែលជាចំណុចផ្ទុះខ្លាំងបំផុតនៃវីរុសបំប្លែងខ្លួនឥណ្ឌា Delta នៅក្នុងប្រទេសចិន ដោយមានករណីឆ្លងចំនួន ៣០៨ ករណីត្រូវបានរាយការណ៍គិតត្រឹមថ្ងៃចន្ទនេះ ។

បន្ថែមពីនេះ អ្នកជំងឺ ៦ នាក់មានជំងឺធ្ងន់ធ្ងរ ហើយប្រសិនបើមានអ្នកណាម្នាក់ស្លាប់ វានឹងក្លាយជាការស្លាប់ដោយសារជំងឺកូវីដ ១៩ លើកដំបូងរបស់ចិនក្នុងរយៈពេលជាង ៦ ខែមកនេះ ។

គួរបញ្ជាក់ថា គិតត្រឹមពេលនេះ ចិនដីគោក បានកត់ត្រាករណីឆ្លងជំងឺកូវីដ ១៩ សរុប ៩៣,៨២៦ ករណី ខណៈអ្នកស្លាប់នៅតែមាន ៤,៦៣៦ នាក់ដដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Bloomberg

ចុចអាន ៖ ចិន ទទួលស្គាល់ វីរុសបំប្លែងខ្លួនឥណ្ឌា Delta ពិតជាពិបាកគ្រប់គ្រង និងមានភាពស្មុគស្មាញ