ព្រហើនមែន បុរស វៀតណាម លួចលក់វិញ្ញាបនបត្រធ្វើតេស្តកូវីដអវិជ្ជមានក្លែងក្លាយរាប់រយសន្លឹក តែត្រូវប៉ូលិសក្របួចជាប់

ប៉ូលិសនៅភាគខាងជើងប្រទេសវៀតណាម បានចាប់ខ្លួនអ្នកជំនួញម្នាក់ពីបទផលិត និងលក់វិញ្ញាបនប័ត្រធ្វើតេស្តរកជំងឺកូវីដ ១៩ អវិជ្ជមានក្លែងក្លាយរាប់រយសន្លឹក ខណៈប្រទេសនេះកំពុងប្រយុទ្ធប្រឆាំងនឹងការផ្ទុះឡើងដ៏អាក្រក់បំផុត នៃវីរុសនេះ ។

រលកឆ្លងថ្មីដែលកើតឡើងចាប់តាំងពីចុងខែមេសា បានបង្ខំឲ្យប្រទេសវៀតណាមដាក់ការរឹតត្បិតលើការធ្វើដំណើរនៅក្នុងទីក្រុង និងខេត្តជាច្រើន ដែលភាគច្រើនតម្រូវឲ្យប្រជាជនមានវិញ្ញាបនបត្រតេស្តអវិជ្ជមាន ដើម្បីអាចធ្វើដំណើរបាន ។

ស្នងការប៉ូលិសបាននិយាយថា លោក Tran Tuan Duong ដែលបើកអាជីវកម្មបោះពុម្ពនៅខេត្ត Bac Ninh ត្រូវបានចាប់ខ្លួនកាលពីថ្ងៃពុធ ទី ១១ ខែសីហា ពីបទលក់វិញ្ញាបនបត្រចំនួន ៦ ដល់អតិថិជនក្នុងតម្លៃ ១ លានដុង (ស្មើនឹង ៤៣.៨៦ ដុល្លារអាមេរិក) ។

ប៉ូលិសបាននិយាយនៅក្នុងសេចក្ដីថ្លែងការណ៍មួយថា លោក Duong អាយុ ៣៤ ឆ្នាំបានសារភាពប្រាប់ប៉ូលិសថា គាត់បានលក់ឯកសារបែបនេះប្រហែល ១៥០ សន្លឹក រួមទាំងឯកសារតេស្ត PCR ក្លែងក្លាយផងដែរ ។

គួរបញ្ជាក់ថា ប្រទេសវៀតណាមបានកត់ត្រាករណីឆ្លងជំងឺកូវីដ ១៩ ជាង ២៤១,០០០ ករណី និងមានអ្នកស្លាប់យ៉ាងហោចណាស់ ៤,៤៨៧ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ វៀតណាម អនុញ្ញាតឲ្យប្រើឱសថបុរាណមួយប្រភេទព្យាបាលកូវីដ