ចាក់ឆ្លាស់គ្នារវាង AstraZeneca និងវ៉ាក់សាំងចាក់តែមួយដូស Sputnik Light បង្កើនកម្រិតអង់ទីគ័រខ្ពស់

មូលនិធិវិនិយោគផ្ទាល់របស់រុស្ស៊ី (RDIF) បាននិយាយនៅថ្ងៃសុក្រនេះថា ការចាក់លាយគ្នានៃវ៉ាក់សាំង AstraZeneca និងវ៉ាក់សាំងចាក់តែមួយដូស Sputnik Light របស់រុស្ស៊ី បានបង្ហាញពីភាពស៊ាំខ្ពស់ ដោយយោងទៅតាមទិន្នន័យបឋមដែលទទួលបាន ក្នុងពេលសាកល្បងព្យាបាលនៅប្រទេសអាស៊ែបៃហ្សង់ ។

RDIF បាននិយាយនៅក្នុងសេចក្តីប្រកាសព័ត៌មានមួយថា “ការសាកល្បងព្យាបាលនៅអាស៊ែបៃហ្សង់បានចាប់ផ្តើមនៅខែកុម្ភៈ ឆ្នាំ ២០២១ ហើយទិន្នន័យបឋមពីអ្នកចូលរួម ២០ នាក់ដំបូងបង្ហាញពីការបង្កើនកម្រិតអង់ទីគ័រខ្ពស់ ប្រឆាំងប្រូតេអ៊ីនវីរុស SARS-CoV-2 ” ។

RDIF បានបញ្ជាក់ថា “ការវិភាគបណ្តោះអាសន្ននៃទិន្នន័យកាលពីពេលកន្លងមក ការចាក់វ៉ាក់សាំង AstraZeneca និង Sputnik Light ទាំងពីរលាយបញ្ចូលគ្នា មានសុវត្ថិភាពខ្ពស់ ហើយមិនមានផលប៉ះពាល់ធ្ងន់ធ្ងរ ឬករណីឆ្លងជំងឺកូវីដ ១៩ ឡើយ បន្ទាប់ពីចាក់” ។

ឯកសារនេះសន្មត់ថា កិច្ចសហប្រតិបត្តិការក្នុងការអភិវឌ្ឈ និងការអនុវត្តកម្មវិធីស្រាវជ្រាវសាកល្បងព្យាបាលនេះ គឺដើម្បីវាយតម្លៃការប្រើប្រាស់រួមគ្នានៃសមាសធាតុវ៉ាក់សាំង Sputnik Light និងសមាសធាតុវ៉ាក់សាំងប្រភេទ AZD1222 ដែលបង្កើតឡើងដោយក្រុមហ៊ុន AstraZeneca សហការជាមួយសាកលវិទ្យាល័យ Oxford ។

គួរបញ្ជាក់ថា វ៉ាក់សាំងចាក់តែមួយដូស Sputnik Light ត្រូវបានចុះបញ្ជីក្នុងប្រទេសរុស្ស៊ីនៅដើមខែឧសភា ហើយប្រសិទ្ធភាពរបស់វាក្នុងការពារជំងឺកូវីដ ១៩ គឺ ៧៩.៤ ភាគរយ ខណៈវ៉ាក់សាំង Sputnik Light ក៏ជាប្រភេទវ៉ាក់សាំងរួមជាមួយវ៉ាក់សាំង Sputnik V ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ WHO រកឃើញវ៉ាក់សាំង AstraZeneca របស់ឥណ្ឌា ក្លែងក្លាយ