លោកស្រី Harris ប្រាប់វៀតណាមថា កងទ័ពជើងទឹកអាមេរិក នឹងរក្សាវត្តមាននៅ សមុទ្រចិនខាងត្បូង

អនុប្រធានាធិបតីអាមេរិកលោកស្រី Kamala Harris បានចាប់ផ្តើមដំណើរទស្សនកិច្ចរបស់ខ្លួនទៅកាន់ប្រទេសវៀតណាមកាលពីថ្ងៃពុធ ដោយសន្យាថា ទីក្រុងវ៉ាស៊ីនតោន នឹងបន្តរក្សាភាពរឹងមាំនៅក្នុងសមុទ្រចិនខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Harris បាននិយាយនៅរដ្ឋធានី ហាណូយ អំឡុងកិច្ចពិភាក្សាជាមួយប្រធានាធិបតីវៀតណាមលោក Nguyen Xuan Phuc និងថ្នាក់ដឹកនាំដទៃទៀតថា “ខ្ញុំសូមបញ្ជាក់ថា កងទ័ពជើងទឹកសហរដ្ឋអាមេរិក នឹងរក្សាវត្តមានដ៏រឹងមាំនៅក្នុងសមុទ្រចិនខាងត្បូង ហើយនឹងបន្តប្រឈមមុខជាមួយការគំរាមកំហែង និងការរំលោភបំពានពីទីក្រុងប៉េកាំងលើដែនសមុទ្រនេះ”។

លោក Harris និយាយទៀតថា សេតវិមានគាំទ្រសំណើរបស់វៀតណាម ចំពោះនាវាល្បាតអតីតឆ្មាំសមុទ្រអាមេរិកទីបី ដើម្បីឲ្យប្រទេសអាស៊ីអាគ្នេយ៍មួយនេះ អាចបង្កើនសមត្ថភាពសន្តិសុខដែនសមុទ្ររបស់ខ្លួន។

យើងត្រូវរកវិធីដាក់សម្ពាធនិងបង្កើនសម្ពាធដោយត្រង់ទៅលើទីក្រុងប៉េកាំង ឲ្យគោរពតាមអនុសញ្ញាអង្គការសហប្រជាជាតិស្តីពីច្បាប់សមុទ្រ និងដើម្បីប្រឆាំងការសម្លុតគំរាមកំហែងនិងការទាមទារដែនសមុទ្រហួសប្រមាណ។

ស្របពេលជាមួយគ្នានោះដែរ លោក Phuc បានគាំទ្រទំនាក់ទំនងកាន់តែរឹងមាំជាមួយ សហរដ្ឋអាមេរិក។

លោក Phuc បាននិយាយកាលពីថ្ងៃពុធថា “វៀតណាមចង់ធ្វើការរួមគ្នាជាមួយសហរដ្ឋអាមេរិក ដើម្បីធ្វើឲ្យស៊ីជម្រៅនូវភាពជាដៃគូគ្រប់ជ្រុងជ្រោយ ក្នុងគោលបំណងលើកកម្ពស់ចំណងមិត្តភាពទ្វេភាគីប្រកបដោយនិរន្តរភាពនិងយូរអង្វែង”។

គួរបញ្ជាក់ថា ទំនាក់ទំនងសហរដ្ឋអាមេរិកជាមួយវៀតណាម មានភាពប្រក្រតីឡើងវិញនៅឆ្នាំ ១៩៩៥ ហើយថ្មីៗនេះ ភាគីទាំងពីរបានធ្វើឲ្យទំនាក់ទំនងកាន់តែស៊ីជម្រៅលើផ្នែកសន្តិសុខ នៅចំពោះមុខទំនាក់ទំនងសេដ្ឋកិច្ច៕

ប្រែសម្រួល៖ Vann Vann

ប្រភព៖ Asia Nikkei

ចុចអាន៖ កងទ័ពជើងទឹក អាមេរិកបញ្ចេញវីដេអូធ្វើសមយុទ្ធ និងឃ្លាំមើលនាវាដឹកយន្តហោះចិននៅសមុទ្រចិនខាងត្បូង