ព័ត៌មានអន្ដរជាតិ

អស់វ៉ាក់សាំង ក្រុងហូជីមិញចាក់ Pfizer ដូសទី២ ក្រោយចាក់ Moderna ដូសទី១

បានផុស

៥ years មុន

នៅ

ថ្ងៃព្រហស្បតិ៍ ៩ កញ្ញា ២០២១

ដោយ

ប្រជាជនមួយចំនួននៅទីក្រុងហូជីមិញដែលបានចាក់វ៉ាក់សាំងបង្ការកូវីដ-១៩ Moderna ដូសទី១ និងត្រូវចាក់វ៉ាក់សាំង Pfizer ដូសទី២។

អ្នករស់នៅខណ្ឌទី១០ ក្រុងហូជីមិញ ស្ត្រីឈ្មោះ Thanh Hoa បានប្រាប់ឪពុកម្តាយដែលទាំងពីរមានអាយុខ្ទង់៧០ឆ្នាំថា អាជ្ញាធរបានស្នើឲ្យចាក់ដូសទី២ បន្ទាប់ពីចាក់ដូសទី១បានរយៈពេល៥សប្តាហ៍។

មួយសប្តាហ៍កន្លងទៅ អ្នកស្រី Hoa បានទៅសួរថាតើពេលណាទើបឪពុកម្តាយរបស់គាត់បានចាក់ដូសទី២អំពីវ៉ាក់សាំង Moderna ពីព្រោះដល់កាលកំណត់ហើយ ប៉ុន្តែគេប្រាប់ថា ឥឡូវនេះអត់មានវ៉ាក់សាំងនេះទេ។ ដូច្នេះឪពុកម្តាយរបស់គាត់សម្រេចចិត្តចាក់ Pfizer ជាដូសទី២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះជាយ៉ាងណាដូសទី១ត្រូវបានចាក់ដោយវ៉ាក់សាំង Moderna ប៉ុន្តែការប្រកាសរបស់អាជ្ញាធរកាលពីថ្ងៃចន្ទគឺឲ្យចាក់វ៉ាក់សាំង Pfizer សម្រាប់ដូសទី២។

វ៉ាក់សាំង Moderna និង Pfizer ទាំងពីរប្រភេទនេះត្រូវបានផលិតដោយប្រើបច្ចេកវិទ្យា mRNA ដូចគ្នាដែលជួយឲ្យកោសិកាមនុស្សបង្កើតប្រូតេអ៊ីនដែលបង្កឲ្យមានការឆ្លើយតបនៃប្រព័ន្ធភាពស៊ាំ។

ទោះជាអាជ្ញាធរមូលដ្ឋានបានប្រកាសឲ្យចាក់វ៉ាក់សាំងលាយចម្រុះគ្នានេះ ប៉ុន្តែមន្ទីរសុខាភិបាលក្រុងហូជីមិញមិនទាន់ចេញសេចក្តីប្រកាសផ្លូវការណាមួយទេជុំវិញការចាក់ដូសទី១ និងទី២ខុសគ្នានេះ។

ប៉ុន្តែកាលពីសប្តាហ៍មុន មនុស្សជាច្រើនបង្ហាញការព្រួយបារម្ភដោយសារដល់ថ្ងៃណាត់ចាក់ដូសទី២ហើយ មិនមានដំណឹងពីការចាក់សោះ។ តាមសេចក្តីណែនាំ ការចាក់វ៉ាក់សាំងModerna ដូសទី១ និងទី២ត្រូវមានចន្លោះរយៈពេលពីគ្នា៤សប្តាហ៍។

អ្នកស្រី Duong Thi Hong នាយករងនៅវិទ្យាស្ថានអនាម័យ និងមេរោគសាស្ត្រជាតិ បាននិយាយថា ក្រសួងសុខាភិបាលធ្លាប់បានណែនាំឲ្យអាជ្ញាធរបម្រុងទុកវ៉ាក់សាំង Moderna ពាក់កណ្តាលសម្រាប់ចាក់ដូសទី២ ពីព្រោះវៀតណាមមិនមានកិច្ចព្រមព្រៀងទិញវ៉ាក់សាំងនេះបន្ថែមទៀតទេ ប៉ុន្តែពឹងលើជំនួយ។

លោក Hong បានបញ្ជាក់ថា រហូតដល់ពេលនេះ ក្រសួងសុខាភិបាលបានត្រៀមបម្រុងទុកវ៉ាក់សាំងទាំងអស់ដែលវៀតណាមទទួលបាន ប៉ុន្តែវ៉ាក់សាំង Monderna មិនមាននៅក្នុងស្តុកទេ។

វៀតណាមទទួលបានវ៉ាក់សាំង Moderna ចំនួន៥លានដូសពីជំនួយអាមេរិក និងជាង៤០០០ដូសទៀតពីសាធារណៈរដ្ឋឆែក ហើយបានចែកចាយទៅកន្លែងចាក់អស់កំឡុងពេលកម្មវិធីចាក់វ៉ាក់សាំងទ្រង់ទ្រាយធំ។

កាលពីថ្ងៃអង្គារ៍ ក្រសួងសុខាភិបាលវៀតណាមបាននិយាយថា ខ្លួនកំពុងពិភាក្សាចាក់លាយចម្រុះពី Moderna ជាមួយវ៉ាក់សាំងផ្សេង ហើយសេចក្តីណែនាំនឹងចេញឆាប់ៗ។

ប្រែសម្រួល៖ វីរបុត្រ
ប្រភព៖ vnexpress

Related Topics:ប្រទេសវៀតណាម