ព័ត៌មានអន្ដរជាតិ

មន្ត្រីការពារជាតិអាមេរិកកំពូល ដាក់បន្ទុកលើកិច្ចព្រមព្រៀងដូហា បណ្តាលឲ្យអាហ្វហ្គានីស្ថានដួលរលំ

បានផុស

៥ years មុន

នៅ

ថ្ងៃព្រហស្បតិ៍ ៣០ កញ្ញា ២០២១

ដោយ

ការចូលកាន់កាប់របស់ក្រុមតាលីបង់លើប្រទេសអាហ្វហ្គានីស្ថានអាចបណ្តាលមកពីកិច្ចព្រមព្រៀងរវាងតាលីបង់ និងរដ្ឋបាល ដូណាល់ ត្រាំ។ នេះជាការលើកឡើងរបស់មន្ត្រីក្រសួងការពារជាតិកំពូលរបស់អាមេរិក។

កិច្ចព្រមព្រៀងដែលហៅថា «កិច្ចព្រមព្រៀងក្រុងដូហា»ត្រូវបានចុះហត្ថលេខានៅក្នុងខែកុម្ភៈ ឆ្នាំ២០២០ និងកំណត់កាលបរិច្ឆេទសម្រាប់សហរដ្ឋអាមេរិកដកកងទ័ពចេញពីអាហ្វហ្គានូស្ថាន។

លោកឧត្តមសេនីយ៍ Frank McKenzie បានលើកឡើងថា កិច្ចព្រមព្រៀងនោះពិតជាមានឥទ្ធិពលអាក្រក់លើរដ្ឋាភិបាល និងយោធាអាហ្វហ្គានីស្ថាន។ ជាមួយគ្នានេះ រដ្ឋមន្ត្រីក្រសួងការពារជាតិអាមេរិក លោក Lloyd Austin បានយល់ស្របនឹងការលើកឡើងរបស់លោក Frank និងបាននិយាយថា កិច្ចព្រមព្រៀងបានជួយតាលីបង់កាន់តែរឹងមាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ថែមលើការកំណត់ពេលវេលាដកកងទ័ពចេញ កិច្ចព្រមព្រៀងក្រុងដូហាក៏រាប់បញ្ចូលទាំងកាតព្វកិច្ចទូលំទូលាយសម្រាប់តាលីបង់ឲ្យចាត់វិធានការទប់ស្កាត់ក្រុមជ្រុលនិយមដូចជា អាល់កៃដា ពីការគំរាមកំហែងលើសហរដ្ឋអាមេរិក និងសម្ព័ន្ធមិត្តរបស់ខ្លួន។

បន្ទាប់ពីឈ្នះការបោះឆ្នោត លោកប្រធានាធិបតីសហរដ្ឋអាមេរិក ចូ បៃដិន បានបន្តអនុវត្តផែនការនោះសម្រាប់ការដកកងទ័ពចេញ ប៉ុន្តែបានពន្យារដល់ថ្ងៃទី៣១ ខែសីហា ខណៈកាលបរិច្ឆេទដំបូងនៅឧសភា។

មន្ត្រីការពារជាតិអាមេរិកបានធ្វើអត្ថាធិប្បាយបែបនេះកាលពីថ្ងៃពុធនៅពេលដែលផ្តល់សក្ខីកម្មចំពោះមុខគណៈកម្មាធិការសេវាកម្មទ័ពរបស់សភាអាមេរិក។

សវនាការត្រូវធ្វើជាច្រើនសប្តាហ៍ បន្ទាប់ពីភាពវឹកវរក្នុងការដក និងជម្លៀសមនុស្សចេញនៅព្រលានយន្តហោះកាប៊ុល នៅពេលប្រទេសផ្សេងៗព្យាយាមជម្លៀសពលរដ្ឋរបស់ខ្លួន ហើយពលរដ្ឋអាហ្វហ្គានីស្ថានរាប់ពាន់នាក់ដែលអស់សង្ឃឹមក៏អង្វរឲ្យជួយដែរ។ ការវាយប្រហារបំផ្ទុះគ្រាប់បែកអត្តឃាតបានសម្លាប់មនុស្ស១៨២នាក់កំឡុងពេលប្រតិបត្តិការនោះ។

ក្នុងនាមជាអគ្គមេបញ្ជាការកណ្តាលអាមេរិក លោកឧត្តមសេនីយ៍ McKenzie បានគ្រប់គ្រងលើការដកទ័ពចេញពីអាហ្វហ្គានីស្ថានដែលជាសញ្ញាបញ្ចប់សង្គ្រាម២០ឆ្នាំ និងជាសង្គ្រាមយូរបំផុតក្នុងប្រទេស។

លោក McKenzie បានប្រាប់គណៈកម្មាធិការថា កិច្ចព្រមព្រៀងក្រុងដូហាមានឥទ្ធិពលផ្លូវចិត្តយ៉ាងខ្លាំងលើរដ្ឋាភិបាលអាហ្វហ្គានីស្ថាន ពីព្រោះវាបានកំណត់កាលបរិច្ឆេទសម្រាប់ពួកគេនៅពេលជំនួញទាំងអស់ដែលពួកគេពឹងផ្អែកត្រូវបានបញ្ចប់។

លោកបាននិយាយថា លោកជឿជាក់យ៉ាងច្បាស់មួយរយៈពេលមកហើយថា បើអាមេរិកកាត់បន្ថយចំនួនទីប្រឹក្សាយោធារបស់ខ្លួននៅអាហ្វហ្គានីស្ថានមកក្រោម២៥០០នាក់ រដ្ឋាភិបាល និងយោធាអាហ្វហ្គានីស្ថានគេចមិនផុតពីការដួលរលំឡើយ។

បន្ទាប់ពីកិច្ចព្រមព្រៀងដូហា លោកបាននិយាយថា ការកាត់បន្ថយកម្លាំងទ័ពដែលបញ្ជាឲ្យដោយ លោកប្រធានាធិបតី ចូ បៃដិន នៅក្នុងខែមេសាគឺជាផ្លូវឆ្ពោះទៅកាន់មរណៈ។

ចំណែកលោក Austin បានលើកឡើងថា ដោយការប្តេជ្ញាចិត្តរបស់អាមេរិកក្នុងបញ្ឈប់ការវាយប្រហារផ្លូវអាកាសលើតាលីបង់ កិច្ចព្រមព្រៀងក្រុងដូហា បានធ្វើឲ្យក្រុមឥស្លាមជ្រុលនិយមមួយនេះកាន់តែរឹងមាំ។ ពួកគេបានបង្កើនការវាយប្រហារលើកម្លាំងទ័ពអាហ្វហ្គានីស្ថានកាន់តែខ្លាំង និងជនជាតិអាហ្វហ្គានីស្ថានបានកំពុងបាត់បង់មនុស្សជាច្រើនជារៀងរាល់សប្តាហ៍៕

ប្រែសម្រួល៖ វីរបុត្រ
ប្រភព៖ BBC

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា