កូរ៉េខាងជើង ធ្វើតេស្តមីស៊ីល ទើបអភិវឌ្ឍន៍ថ្មីមួយគ្រាប់ទៀត

ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃសុក្រនេះថា ប្រទេសកូរ៉េខាងជើង បានបាញ់មីស៊ីលប្រឆាំងយន្តហោះដែលទើបនឹងអភិវឌ្ឍន៍ថ្មីមួយគ្រាប់ កាលពីថ្ងៃព្រហស្បតិ៍ទី៣០ ខែកញ្ញា ដែលនេះជាការសាកល្បងអាវុធចុងក្រោយបំផុតរបស់ខ្លួន ចំពេលកិច្ចចរចាស្តីពីការរំសាយអាវុធនុយក្លេអ៊ែរជាមួយសហរដ្ឋអាមេរិក ត្រូវជាប់គាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះគឺជាការសាកល្បងអាវុធលើកទី ២ របស់កូរ៉េខាងជើងនៅសប្តាហ៍នេះ បន្ទាប់ពីការធ្វើតេស្តមីស៊ីលល្បឿនលឿនជាងសំឡេង កាលពីថ្ងៃអង្គារ។ មិនតែប៉ុណ្ណោះ កូរ៉េខាងជើងក៏បានបាញ់មីស៊ីលបាលីស្ទិក និងមីស៊ីលផ្លោងដែលមានសមត្ថភាពនុយក្លេអ៊ែរផងដែរ ក្នុងរយៈពេលប៉ុន្មានសប្តាហ៍ចុងក្រោយនេះ។

ការធ្វើតេស្តនេះ បានគូសបញ្ជាក់ពីរបៀបដែលកូរ៉េខាងជើងកំពុងអភិវឌ្ឍន៍ អាវុធទំនើបៗឥតឈប់ឈរ ដោយបង្កឲ្យមានការសង្ស័យលើកិច្ចខិតខំប្រឹងប្រែងដល់ការបោះបង់កម្មវិធីនុយក្លេអ៊ែរនិងមីស៊ីលរបស់ខ្លួន ជាថ្នូរនឹងការបន្ធូរបន្ថយទណ្ឌកម្មពីសំណាក់សហរដ្ឋអាមេរិក។

បណ្ឌិត្យសភាវិទ្យាសាស្ត្រការពារជាតិ ដែលជាអ្នកអភិវឌ្ឍន៍អាវុធយោធា បាននិយាយថា ការធ្វើតេស្តនេះ មានគោលបំណងបញ្ជាក់ពីមុខងារជាក់ស្តែង រ៉ាដា យានបញ្ជាប្រយុទ្ធគ្រប់ជ្រុងជ្រោយនិងប្រតិបត្តិការប្រយុទ្ធរបស់មីស៊ីល។

បណ្ឌិត្យសភាបានបន្ថែមថា មីស៊ីលនេះមានបំពាក់បច្ចេកវិទ្យាសំខាន់ថ្មីៗដូចជាឧបករណ៍គ្រប់គ្រងចង្កូតភ្លោះ និងម៉ាស៊ីនហោះហើរទ្វេដង៕

ប្រែសម្រួល៖ Vann Vann

ប្រភព៖ CNA

ចុចអាន៖ កូរ៉េខាងជើងបាញ់ថ្ងៃមុន ជាមីស៊ីល ល្បឿនលឿនជាងសំឡេងទំនើប ទើបអភិវឌ្ឍន៍ថ្មី