អូស្រ្តាលីដកការបិទខ្ទប់ បើកប្រទេស រស់នៅជាមួយ កូវីដ

ហាងកាហ្វេ កន្លែងហាត់ប្រាណនិងភោជនីយដ្ឋាននៅទីក្រុងស៊ីដនី បានបើកជាថ្មី ស្វាគមន៍អតិថិជនដែលបានចាក់វ៉ាក់សាំងពេញលេញនៅថ្ងៃចន្ទទី ១១ ខែតុលានេះ បន្ទាប់ពីការបិទខ្ទប់អស់រយៈពេលជិត ៤ ខែ ខណៈប្រទេសអូស្ត្រាលី មានបំណងចាប់ផ្តើមរស់នៅជាមួយជំងឺកូវីដ-១៩ តាមរយៈអត្រាចាក់វ៉ាក់សាំងខ្ពស់ និងការបើកប្រទេសឡើងវិញបន្តិចម្តងៗ។

ហាងស្រាមួយចំនួននៅក្នុងទីក្រុងស៊ីដនី ដែលជាទីក្រុងធំបំផុតរបស់ប្រទេសអូស្រ្តាលី បានបើកទ្វារនៅម៉ោង ១២:០១ រំលងអាធ្រាត្រឈានចូលថ្ងៃចន្ទនេះ ខណៈមិត្តភក្តិនិងក្រុមគ្រួសារ បានជួបជុំគ្នាផឹកស៊ីជប់លៀងទាំងកណ្តាលយប់។

ប៉ុន្តែទោះបីជាមានអារម្មណ៍រំភើបក៏ដោយ ក៏នៅតែមានការព្រួយបារម្ភផងដែរអំពីបញ្ហាដែលនឹងកើតឡើងក្រោយការបើកប្រទេសឡើងវិញ។

ប្រជាជនជាង ៥ លាននាក់នៅទីក្រុងស៊ីដនី បានជាប់គាំងក្នុងការបិទខ្ទប់យ៉ាងតឹងរ៉ឹង ចាប់តាំងពីខែមិថុនាមក ដើម្បីទប់ស្កាត់វីរុសបំប្លែងខ្លួន Delta ដែលបានរីករាលដាលដល់ទីក្រុង មែលប៊ននិងរដ្ឋធានីកង់បេរ៉ា ដោយបង្ខំឲ្យទីនោះត្រូវបិទខ្ទប់ដូចគ្នា។

ស្របពេលជាមួយគ្នានោះ លោក Dominic Perrottet អភិបាលរដ្ឋ New South Wales បានជំរុញឲ្យអ្នកក្រុងស៊ីដនី ទប់អារម្មណ៍សិន កុំទាន់ប្រញាប់សប្បាយខ្លាំងពេក ខណៈលោកព្រមានថា ករណីឆ្លងនឹងកើនឡើងបន្ទាប់ពីការបើកឡើងវិញនេះ។

នៅក្រោមច្បាប់បន្ធូរបន្ថយនេះ មនុស្សដែលបានចាក់វ៉ាក់សាំងពេញលេញចំនួន ១០ នាក់អាចប្រមូលផ្តុំគ្នានៅក្នុងផ្ទះ ខណៈ ១០០ នាក់អាចចូលរួមពិធីមង្គលការនិងពិធីបុណ្យសពបាន។

ហាងលក់រាយអាចបើកបាន ដោយកាត់បន្ថយចំនួនមនុស្ស ស្របពេលរដ្ឋជំរុញឲ្យ អត្រាវ៉ាក់សាំងឈានឲ្យដល់ ៨០ ភាគរយត្រឹមចុងខែតុលា នៅពេលការរឹតត្បិតបន្ថែមទៀត នឹងត្រូវបន្ធូរបន្ថយ។ ប៉ុន្តែអ្នកដែលមិនបានចាក់វ៉ាក់សាំង ត្រូវតែនៅផ្ទះរហូតដល់ថ្ងៃទី ១ ខែធ្នូឯណោះ៕

ប្រែសម្រួល៖ Vann Vann

ប្រភព៖ CNA

ចុចអាន៖ មកស្គាល់ ៥ ប្រទេស កូវីដ ចូលមិនចោះ