អ្នកវាយប្រហារ ប្រើធ្នូនិងព្រួញ សម្លាប់រង្គាលនៅប្រទេស ន័រវែស

មនុស្សចំនួន ៥ នាក់ត្រូវបានស្លាប់និង ២ នាក់ទៀតរងរបួសនៅប្រទេសន័រវែស បន្ទាប់ពីបុរសម្នាក់ប្រើធ្នូនិងព្រួញវាយប្រហារពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលិសបានទទួលសេចក្តីរាយការណ៍ដំបូង អំពីការវាយប្រហារក្នុងទីក្រុង Kongsberg ភាគនិរតីរដ្ឋធានី Oslo នៅម៉ោងប្រហែល ១៨:១៣ នាទី (ម៉ោងក្នុងស្រុក)។

មេប៉ូលិសលោក Oeyvind Aas បាននិយាយថា ជនសង្ស័យត្រូវបានចាប់ខ្លួន ហើយហាក់ដូចជាធ្វើសកម្មភាពតែម្នាក់ឯងគត់។

ស្របពេលជាមួយគ្នានោះដែរ អ្នកនាំពាក្យបាននិយាយថា ប៉ូលិសនឹងធ្វើការស៊ើបអង្កេតថាតើ វាជាអំពើភេរវកម្មឬយ៉ាងណា។

អ្នកវាយប្រហារបានធ្វើសកម្មភាពនៅខាងក្នុងផ្សារទំនើប Coop Extra នៅផ្នែកខាងលិចទីក្រុង Kongsberg។ ម្នាក់ក្នុងចំណោមអ្នករងរបួស គឺជាមន្រ្តីប៉ូលិសនៅក្នុងហាង។

ក្រុមមន្រ្តីក៏កំពុងស៊ើបអង្កេតផងដែរថា តើអ្នកវាយប្រហារបានប្រើអាវុធផ្សេងទៀតដែរឬទេក្នុងហេតុការណ៍នេះ។

គួរបញ្ជាក់ថា ន័រវែស ត្រូវបានគេស្គាល់ថាជាប្រទេសមានសន្តិភាព ប៉ុន្តែប្រទេសនេះបានទទួលរងនូវការបាញ់ប្រហារសម្លាប់រង្គាលដ៏អាក្រក់បំផុតមួយក្នុងប្រវត្តិសាស្ត្រ នៅថ្ងៃទី ២២ ខែកក្កដាឆ្នាំ ២០១១ នៅពេលដែលក្រុមជ្រុលនិយម Anders Behring Breivik បានសម្លាប់មនុស្សចំនួន ៧៧ នាក់៕

ប្រែសម្រួល៖ Vann Vann

ប្រភព៖ BBC

ចុចអាន៖ បណ្តុំវីដេអូស្តែងៗ នៃការបាញ់ប្រហារក្នុងសាកលវិទ្យាល័យ រុស្ស៊ី កាលពីម្សិលមិញ