ន័រវែស បើកសវនាការ ជំនុំជម្រះទោសបុត្រារបស់ម្ចាស់ក្សត្រី Mette-Marit ជុំវិញការចោទប្រកាន់ច្រើនករណី

ប្រទេសន័រវែសបានចាប់ផ្តើមសវនាការដ៏ធំមួយ ដើម្បីជំនុំជម្រះទោស Marius Borg Høiby ដែលត្រូវជាបុត្រារបស់ម្ចាស់ក្សត្រីប្រទេសនេះ ក្រោមការចោទប្រកាន់ជាច្រើនករណី។

តាមការផ្សាយរបស់ BBC នៅថ្ងៃអង្គារទី៣ ខែកុម្ភៈ ឆ្នាំ២០២៦, សវនាការបានចាប់ផ្តើមក្នុងទីក្រុង Oslo លើសំណុំរឿងដ៏ល្បីកក្រើកពាក់ព័ន្ធបុត្រារបស់ម្ចាស់ក្សត្រី Mette-Marit ជុំវិញការចោទប្រកាន់រំលោភសេពសន្ថវៈ អំពើហិង្សា បទល្មើសគ្រឿងញៀន​និង បទឧក្រិដ្ឋផ្សេងៗទៀត។

ជុំវិញករណីរំលោភសេពសន្ថវៈ Høiby រងការចោទប្រកាន់ថាបានរំលោភជនរងគ្រោះ ដែលគេចោទថាស្ថិតក្នុងស្ថានភាពសន្លប់ឬមិនអាចតបតបាន ក្នុងហេតុការណ៍ទាំងនេះត្រូវបានគេនិយាយថាបានកើតឡើងនៅចន្លោះឆ្នាំ ២០១៨ ដល់ខែវិច្ឆិកា ឆ្នាំ ២០២៤។

Høiby ក៏ត្រូវចោទប្រកាន់ពីបទអំពើហិង្សាលើរាងកាយនិងផ្លូវចិត្តប្រឆាំងអតីតដៃគូ, បទល្មើសគ្រឿងញៀនពាក់ព័ន្ធការដឹកជញ្ជូនកញ្ឆាទម្ងន់ ៣.៥ គីឡូក្រាម និងបទឧក្រិដ្ឋផ្សេងៗទៀតដូចជា ការគំរាមកំហែងសម្លាប់ រំលោភលើដីកាហាមឃាត់ និងការបំពានច្បាប់ចរាចរណ៍ផងដែរ។

ប្រសិនបើត្រូវបានរកឃើញថាមានទោស Høiby អាចប្រឈមនឹងការជាប់ពន្ធនាគារពី ១០ ទៅ ១៦ ឆ្នាំ ហើយសវនាការនេះត្រូវគេហៅថាជា «រឿងអាស្រូវដ៏ធំបំផុត» ក្នុងប្រវត្តិសាស្ត្រ ១២០ ឆ្នាំនៃរាជវង្សន័រវែសសម័យទំនើប។

សូមជម្រាបថា ដ្បិត Høiby ជាសមាជិកនៃគ្រួសាររាជវង្សក៏ដោយ ប៉ុន្តែ Høiby មិនមានគោរមងារជា «ព្រះអង្គ» ដូចសមាជិកដទៃទៀតឡើយ។ Høiby គឺជាកូនប្រុសរបស់ព្រះនាង Mette-Marit ជាមួយអតីតដៃគូរបស់ទ្រង់ មុនពេលព្រះនាងរៀបអភិសេកជាមួយព្រះអង្គម្ចាស់ Haakon។

នៅពេល Mette-Marit ក្លាយជាព្រះនាងម្ចាស់នៃប្រទេសន័រវែស Høiby ត្រូវបានទទួលស្វាគមន៍ឲ្យរស់នៅក្នុងរាជវាំង និងត្រូវចាត់ទុកជាផ្នែកមួយនៃគ្រួសាររាជវង្ស ប៉ុន្តែមិនមែនជាខ្សែរាជវង្សនោះទេ។ ​ដូច្នេះហើយ Høiby មិនមានតួនាទីជាតំណាងរាជវង្ស ឬបំពេញភារកិច្ចផ្លូវការណាមួយឲ្យរដ្ឋឡើយ៕

អត្ថបទ៖ សុខ សុវណ្ណ