ព័ត៌មានអន្ដរជាតិ

អ៊ុយក្រែន ត្រៀមផលិតគ្រាប់មីស៊ីលក្នុងស្រុក ប្រើសម្រាប់ខែលការពារ NASAMS

បានផុស

១ year មុន

នៅ

ថ្ងៃអង្គារ ២៤ មិថុនា ២០២៥

ដោយ

Chheang

អ៊ុយក្រែន បានចាប់ផ្តើមគំនិតផ្តួចផ្តើមរួមគ្នាជាមួយក្រុមហ៊ុនការពារជាតិ និងអាកាសចរណ៍ Kongsberg របស់ប្រទេសន័រវេស ដើម្បីផលិតមីស៊ីលស្ទាក់ចាប់ សម្រាប់ប្រព័ន្ធការពារដែនអាកាសនៅក្នុងទឹកដីអ៊ុយក្រែន ដែលជាជំហានដ៏សំខាន់មួយចំពោះកម្លាំងរបស់ទីក្រុងកៀវ សម្រាប់ធ្វើមូលដ្ឋានីយកម្មមូលដ្ឋានយោធា និងឧស្សាហកម្មរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការឲ្យដឹងពីក្រសួងឧស្សាហកម្មយុទ្ធសាស្ត្រអ៊ុយក្រែនកាលពីថ្ងៃទី២៣ខែមិថុនា ជាជំហានដំបូងនៃកិច្ចសន្យាផលិតកម្មនេះ នឹងមានការអភិវឌ្ឍ និងបង្កើតមីស៊ីលជាច្រើនប្រភេទ សម្រាប់ប្រើបំពាក់ជាមួយខែលការពារដែនអាកាស NASAMS របស់អាមេរិក-ន័រវែស។

ប្រធានក្រុមហ៊ុន Kongsberg លោក Eirik Lie បានលើកឡើងថា ក្រុមហ៊ុន Kongsberg កំពុងបង្កើតក្រុមហ៊ុនបុត្រសម្ព័ន្ធមួយក្នុងប្រទេសអ៊ុយក្រែន និងធ្វើការយ៉ាងជិតស្និទ្ធជាមួយក្រុមហ៊ុនការពារជាតិក្នុងស្រុក ដើម្បីបង្កើតក្រុមហ៊ុនបណ្តាក់ទុនរួមគ្នា។ ការបណ្តាក់ទុននេះ មានគោលបំណងផ្តល់នូវការផលិតទ្រង់ទ្រាយធំ ដោយពង្រីកការផលិតមីស៊ីលរាប់រយគ្រាប់ត្រឹមរយៈពេលប៉ុន្មានខែ និងប្រើប្រាស់បច្ចេកវិទ្យាអ៊ុយក្រែនដើម្បីបង្កើនបរិមាណ និងប្រសិទ្ធភាព។

លោក Rustem Umierov រដ្ឋមន្ត្រីការពារជាតិអ៊ុយក្រែន បានប្រាប់ថា គម្រោងអភិវឌ្ឍន៍នេះ នឹងក្លាយជាធាតុសំខាន់ក្នុងការការពារប្រជាជន និងហេដ្ឋារចនាសម្ព័ន្ធសំខាន់ៗចំពេលមានការវាយប្រហារជាបន្តបន្ទាប់របស់រុស្ស៊ី។ លោក Umierov បាននិយាយថា «នៅក្នុងខែនេះ សត្រូវបានបាញ់មីស៊ីល និងយានគ្មានមនុស្សបើក ជាង ៣ ៥០០គ្រាប់។ យើងកំពុងធ្វើការដើម្បីបង្កើនការផលិត និងបង្កើនល្បឿននៃការចែកចាយ»៕

ដោយ៖ ឈាង