ន័រវែស បង្កើន​ជំនួយ​ដល់​អ៊ុយក្រែន​ដល់ ៧,៨​ពាន់​លាន​ដុល្លារ​ក្នុង​ឆ្នាំ​២០២៥

យោង​តាម​ការ​ចុះផ្សាយ​របស់​ Kyi Independent កាល​ពី​ថ្ងៃ​​ទី​៧​ខែ​មីនា ប្រទេសន័រវែស​បានប្រកាសផែនការបង្កើនការគាំទ្រផ្នែកហិរញ្ញវត្ថុរបស់ខ្លួនយ៉ាងសំខាន់សម្រាប់អ៊ុយក្រែនក្នុងឆ្នាំ​២០២៥។

នាយករដ្ឋមន្ត្រី​ន័រវែស លោក Jonas Gahr Store បានជំរុញ​ឲ្យ​សភាអនុម័តការផ្តល់មូលនិធិបន្ថែម ដោយនាំយកជំនួយសរុបដល់ទៅប្រហែល ៧,៨​ពាន់លានដុល្លារសម្រាប់​អ៊ុយក្រែន ខណៈ​គម្រោង​ដំបូង​ឡើយ​មាន​ត្រឹម ២,១​ពាន់​លាន​ដុល្លារ​ប៉ុណ្ណោះ។ ការកើនឡើងយ៉ាងច្រើននេះ មានគោលបំណងពង្រឹងសមត្ថភាពការពារជាតិរបស់អ៊ុយក្រែន និងផ្តល់ជំនួយមនុស្សធម៌ចំពេលមានជម្លោះដែលកំពុងបន្ត។

ចំណាត់ការនេះ ស្របតាមកិច្ចខិតខំប្រឹង​ប្រែង​កាន់តែ​ខ្លាំង​​របស់អឺរ៉ុប ដើម្បីបង្កើនការចំណាយលើវិស័យការពារជាតិ និងគាំទ្រអ៊ុយក្រែន។ នៅក្នុងកិច្ចប្រជុំកំពូលនាពេលថ្មីៗនេះ​នៅទីក្រុងប្រ៊ុចសែល មេដឹកនាំសហភាពអឺរ៉ុបបានយល់ព្រមប្រមូលប្រាក់រហូតដល់ ៨០០​ពាន់លានអឺរ៉ូ រួមទាំងប្រាក់កម្ចីចំនួន ១៥០​ពាន់លានអឺរ៉ូ សម្រាប់ការទិញរួមគ្នានៃឧបករណ៍ការពារជាតិ។ ការប្តេជ្ញាចិត្តរបស់ន័រវែសបន្ថែមលើកិច្ចខិតខំប្រឹងប្រែងរួមនេះ ដោយឆ្លុះបញ្ចាំងពីជំហរបង្រួបបង្រួមប្រឆាំងនឹងការឈ្លានពានក្នុងតំបន់ និងការយកចិត្តទុកដាក់ចំពោះការគាំទ្រអ៊ុយក្រែនក្នុងអំឡុងពេលដ៏លំបាកទាំងនេះ។

ន័រវែស គឺជាអ្នកគាំទ្រដ៏រឹងមាំបំផុតរបស់អ៊ុយក្រែននៅអឺរ៉ុប។ កាលពី​លើក​មុន លោក Store បានប្រកាសកាលពីខែធ្នូ​ឆ្នាំ​២០២៤​ថា ប្រទេស​របស់​លោក​​នឹងផ្តល់ប្រាក់ចំនួន ២៤២​លានដុល្លារ ដើម្បីជំរុញកងទ័ពជើងទឹកអ៊ុយក្រែន និងជួយទប់ស្កាត់ការគំរាមកំហែងរបស់រុស្ស៊ីនៅក្នុងសមុទ្រខ្មៅ៕

ដោយ៖ ឈាង