វ៉ាក់សាំង Sputnik V ដែល កម្ពុជា អនុញ្ញាតប្រើប្រាស់បន្ទាន់ បើចាក់ជាដូសជំរុញ ក៏មិនមានផលប៉ះពាល់ដែរ

កាលពីយប់ថ្ងៃសុក្រ ទី២៩ ខែកញ្ញា វ៉ាក់សាំង​កូ​វីដ​ ១៩ ប្រភេទ Sputnik V របស់​ប្រទេស​រុស្ស៊ី ត្រូវបានក្រសួងសុខាភិបាល​ កម្ពុជា ចេញសេចក្តីជូនដំណឹងអនុញ្ញាត​ឲ្យ​ប្រើប្រាស់​ក្នុង​លក្ខខណ្ឌ​បន្ទាន់ ប៉ុន្តែក្រសួងមិនទាន់បញ្ជាក់ពីយកវ៉ាក់សាំងនេះប្រើប្រាស់សម្រាប់ការចាក់ជាដូសណាមួយនៅឡើយទេ ។

ទន្ទឹមនោះលោក Alexander Gintsburg ប្រធានមជ្ឈមណ្ឌលស្រាវជ្រាវ Gamaleya របស់រុស្ស៊ីបានប្រាប់សារព័ត៌មាន Sputnik ថា អ្នកដែលចាក់វ៉ាក់សាំងកូវីដ ១៩ ប្រភេទ Sputnik V របស់រុស្ស៊ីមិនមានបញ្ហាអំពីផលប៉ះពាល់ណាមួយឡើយ សូម្បីតែក្នុងចំណោមអ្នកដែលត្រូវបានចាក់វ៉ាក់សាំងនេះជាដូសជំរុញក៏ដោយ ។

នៅពេលត្រូវបានសួរអំពីផលប៉ះពាល់ លោក Gintsburg បាននិយាយថា “បច្ចុប្បន្នមិនមានការត្អូញត្អែរអំពីផលប៉ះពាល់ណាមួយនោះទេ ជាពិសេសក្នុងចំណោមអ្នកដែលទទួលបានការចាក់វ៉ាក់សាំង Sputnik V ជាដូសទី ៣” ។

គួររំឭកថា នៅខែសីហា ឆ្នាំ ២០២០ រុស្ស៊ីបានក្លាយជាប្រទេសដំបូងគេក្នុងពិភពលោក បានចុះបញ្ជីវ៉ាក់សាំងប្រឆាំងនឹងកូវីដ មានឈ្មោះថា Sputnik V ដែលត្រូវបានបង្កើតឡើងដោយវិទ្យាស្ថានស្រាវជ្រាវ Gamaleya ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាយុប៉ុន្មានទើបអាចចាក់វ៉ាក់សាំង Sputnik V ដែល កម្ពុជា អនុញ្ញាតឲ្យប្រើប្រាស់បន្ទាន់