ប្រធានាធិបតីទួរគីនឹងចាក់វ៉ាក់សាំងកូវីដ ដើម្បីធ្វើជាគំរូសម្រាប់ប្រទេសជាតិ

ប្រធានាធិបតីទួរគីបាននិយាយកាលពីថ្ងៃសុក្រថា ក្រៅពីប្រទេសចិន ទួរគីកំពុងទាក់ទងជាមួយប្រទេសរុស្ស៊ីលើវ៉ាក់សាំងប្រឆាំងជំងឺកូវីដ ១៩ ហើយគាត់នឹងចាក់វ៉ាក់សាំងដើម្បីធ្វើជាគំរូសម្រាប់ប្រទេសជាតិ ។

លោកប្រធានាធិបតី Recep Tayyip Erdogan បានប្រាប់អ្នកយកព័ត៌មាន បន្ទាប់ពីការបន់ស្រន់កាលពីថ្ងៃសុក្រនៅទីក្រុងអ៊ីស្តង់ប៊ុលនៃប្រទេសទួរគីថា “យើងមានកិច្ចពិភាក្សាជាបន្តជាមួយរុស្ស៊ី និងចិន ។ នៅលើបញ្ហានេះ ខ្ញុំផ្ទាល់មិនមានបញ្ហាជាមួយនឹងការចាក់វ៉ាក់សាំងនោះទេ” ។

លោក Erdogan បាននិយាយថា វាជាជំហានមួយដែលគួរតែត្រូវបានអនុវត្តដើម្បីធ្វើជាគំរូដល់ប្រទេសជាតិ និងសុខភាពប្រជាជនដែលចាំបាច់ត្រូវធ្វើ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បច្ចុប្បន្នប្រទេសចិនមានក្រុមហ៊ុនផលិតវ៉ាក់សាំងចំនួន ៣ រួមមាន Sinovac Biotech ក្រុមហ៊ុន CanSino Biologics និងក្រុមហ៊ុន Sinophram Group សុទ្ធតែបានបង្ហាញពីជោគជ័យ ១០០ ភាគរយនៅក្នុងការសាកល្បងព្យាបាលដំណាក់កាលកណ្តាល ឬទី ២ ខណៈវ៉ាក់សាំងរុស្ស៊ី Sputnik V បានបង្ហាញប្រសិទ្ធភាព ៩២ ភាគរយ បន្ទាប់ពីលទ្ធផលបឋមនៃការសាកល្បងព្យាបាលដំណាក់កាលទី ៣ ។

គួរបញ្ជាក់ថា គិតត្រឹមពេលនេះប្រទេសទួរគីមានករណីឆ្លងជំងឺកូវីដ ១៩ ចំនួន ៧៦៥,៩៩៧ ករណី និងមានអ្នកស្លាប់ចំនួន ១៤,៥០៩ នាក់ ខណៈអ្នកជាសះស្បើយមានចំនួន ៤២៣,១៤២ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ដំណឹងល្អ! កម្ពុជានិងប្រទេសអាស៊ីអាគ្នេយ៍៥ទៀតនឹងទទួលបានវ៉ាក់សាំងកូវីដ

ចុចអាន ៖ រុស្ស៊ី ចាប់ផ្តើមយុទ្ធនាការចាក់វ៉ាក់សាំងកូវីដក្នុងទីក្រុង មូស្គូ ហើយ!