ពេលដំណើរតាមអាកាសលើកដំបូង ស្ត្រីខ្ពស់ជាងគេលើលោក ត្រូវមហាជនចាប់អារម្មណ៍ខ្លាំង

ព័ត៌មានដែលថា ស្ត្រីមានកម្ពស់ខ្ពស់ជាងគេលើលោក បានធ្វើដំណើរតាមយន្តហោះជាលើកដំបូង បានទាក់ទាញការចាប់អារម្មណ៍យ៉ាងខ្លាំងពីមហាជន និងប្រព័ន្ធផ្សព្វផ្សាយទូទាំងពិភពលោក។

​កញ្ញា Rumeysa Gelgi អាយុ ​២៥​ឆ្នាំ រស់នៅ​ប្រទេស​តួ​ក​គី កម្ពស់ ២.១៥ម៉ែត្រ ត្រូវបានស្ថាប័ន Guinness World Records កត់បញ្ជីជាមនុស្សដែលមានកម្ពស់ខ្ពស់ជាងគេបំផុតក្នុងពិភពលោក នៅឆ្នាំ២០២១។ កាលពីខែកញ្ញា ឆ្នាំមុន វាគឺជាបទពិសោធន៍លើកដំបូងក្នុងជីវិតរបស់នាង ដែលបានឆ្លងកាត់អារម្មណ៍នៃការហោះហើរពីទីក្រុងអ៊ីស្តង់ប៊ុល ប្រទេសទួរគី ទៅកាន់ទីក្រុងសាន់ហ្វ្រាន់ស៊ីស្កូ សហរដ្ឋអាមេរិក អស់រយៈពេលជាង ១៣ម៉ោង។

ដោយសារកម្ពស់ដ៏ខ្ពស់ជាងគេ Rumeysa Gelgi មិនអាចជិះកៅអីធម្មតាដូចអ្នកដំណើរទូទៅបានឡើយ។ ដូច្នេះ ក្នុងពេលនោះក្រុមហ៊ុនអាកាសចរណ៍បានផ្លាស់ប្តូរកៅអីធម្មតាចំនួន ៦ ទៅជាកៅអីវែង ដើម្បីឱ្យ Rumeysa Gelgi អាចគេងបានស្រួល ក្នុងអំឡុងពេលធ្វើដំណើរទៅដល់ទិសដៅប្រកបដោយផាសុខភាព។

ថ្លែងទៅកាន់អ្នកសារព័ត៌មាននៅអាកាសយានដ្ឋាន Rumeysa Gelgi បាននិយាយថា នោះគឺជាការហោះហើរលើកដំបូង ដ៏ដូចជាការធ្វើដំណើរក្រៅប្រទេសលើកទីមួយក្នុងជីវិតផងដែរ។ ដោយសារនាងមិនអាចអង្គុយបានយូរ ព្រោះបញ្ហាឆ្អឹងខ្នង ទើបបានជាខាងក្រុមហ៊ុនរៀបចំកៅអីពិសេឱ្យនាងសម្រាកតែម្ដង៕

ប្រែសម្រួល៖ សន្យា

ចុចអាន៖ នារីទួរគីបំបែកកំណត់ត្រា Guinness ជាស្រ្តីមានកម្ពស់ខ្ពស់ជាងគេលើលោក