វៀតណាម ផ្អាកតេស្តវ៉ាក់សាំងកូវីដលើមនុស្ស ដោយសារគ្មាន អ្នកស្ម័គ្រចិត្ត

អ្នកវិទ្យាសាស្ត្រជាន់ខ្ពស់ម្នាក់បានប្រកាសថា ការសាកល្បងដំណាក់កាលទី ៣ នៃវ៉ាក់សាំងការពារជំងឺកូវីដ ១៩ Covivac របស់វៀតណាមត្រូវបានផ្អាក ដោយសារការលំបាកក្នុងការស្វែងរកអ្នកស្ម័គ្រចិត្ត ។

លោក Vu Dinh Thiem នាយកមជ្ឈមណ្ឌលពិសោធន៍គ្លីនិកនៃវិទ្យាស្ថានជាតិអនាម័យ និងរោគរាតត្បាតបាននិយាយកាលពីថ្ងៃអង្គារថា ការសាកល្បងដំណាក់កាលទី ៣ សម្រាប់វ៉ាក់សាំងកូវីដត្រូវការអ្នកស្ម័គ្រចិត្តប្រហែល ៤,០០០ នាក់ ។

លោកបាននិយាយថា “ការស្វែងរកអ្នកស្ម័គ្រចិត្តមានការលំបាក ដោយសារគ្មានស្រុកណាដែលមនុស្សមិនបានចាក់វ៉ាក់សាំងរាប់ពាន់នាក់នោះទេ ។ ដូចនេះ ក្រុមស្រាវជ្រាវត្រូវតែផ្អាកការសាកល្បងព្យាបាល ហើយស្វែងរកជម្រើសផ្សេង” ។

លោក Thiem បាននិយាយថា ក្រុមការងារកំពុងពិចារណាលើគំនិតនៃការស្រាវជ្រាវចាក់ជាដូសជំរុញដើម្បីប្រើប្រាស់នៅពេលអនាគត ព្រោះមិនមានពេលវេលាសម្រាប់បន្តការសាកល្បងដំណាក់កាលទី ៣ នោះទេ ។

ចំណែកចំពោះការចាក់វ៉ាក់សាំងការពារកូវីដផ្សេងទៀត វៀតណាម​សម្រេចបានការចាក់ដូសដំបូងដល់​មនុស្ស​ចំនួន ៧១ ​លាន​នាក់ ខណៈប្រហែល ៥០.៩ លាននាក់បានចាក់ពេញ ២ ដូស ៕

ប្រែសម្រួលដោយ ៖ ជីវ័ន្ត

ប្រភព ៖ VNExpress

ចុចអាន ៖ វៀតណាម ពិចារណាហាមប្រាមការធ្វើដំណើរទាំងទៅ និងមកពី អាហ្វ្រិកខាងត្បូង