ឡើងកម្តៅ! អង់គ្លេស បញ្ជូនទ័ព និងសព្វាវុធបច្ចេកវិទ្យាទំនើបទៅ អ៊ុយក្រែន ហើយ (មានវីដេអូ)

កាលពីយប់ថ្ងៃទី១៧ខែមករា ចក្រភពអង់គ្លេសបានបញ្ជូនកងទ័ព និងសព្វាវុធបច្ចេកវិទ្យាទំនើបទៅកាន់ប្រទេសអ៊ុយក្រែន ក្នុងគោលបំណងរារាំងការឈ្លានពានរបស់រុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសញ្ញាច្បាស់ៗទៅកាន់លោក វ្ល៉ាឌីមៀរ ពូទីន, យន្តហោះដឹកជញ្ជូនពីរគ្រឿងរបស់ កងទ័ពអាកាសអង់គ្លេស បាននាំយកប្រព័ន្ធមីស៊ីលដែលត្រូវការជាចាំបាច់ទៅឲ្យកងកម្លាំងទីក្រុង គៀវ។ កងទ័ពក៏​បាន​ជិះក្នុង​យន្តហោះនោះដែរ ហើយ​នឹង​បន្ត​នៅ​ក្នុង​ប្រទេស​អ៊ុយក្រែន ដើម្បី​បង្រៀន​ទាហានអ៊ុយក្រែន អំ​ពី​របៀប​ប្រយុទ្ធ​នឹង​រថក្រោះ​រុស្ស៊ី។

រដ្ឋមន្ត្រីក្រសួងការពារជាតិអង់គ្លេស លោក Ben Wallace បាននិយាយថា ការដាក់ពង្រាយនេះ កើតឡើងដោយសារតែអាកប្បកិរិយាគំរាមកំហែងកាន់តែខ្លាំងឡើង ពីប្រទេសរុស្ស៊ី។

ដោយព្រមានលោកប្រធានាធិបតី ពូទីន ប្រឆាំងនឹងអ្វីដែលអាចជាសង្រ្គាមបង្ហូរឈាម, លោក Wallace បានប្រាប់សមាជិកសភាថា “ចក្រភពអង់គ្លេសកំពុងផ្តល់កញ្ចប់ជំនួយសន្តិសុខថ្មីមួយ ដើម្បីបង្កើនសមត្ថភាពការពាររបស់អ៊ុយក្រែន។ យើង​បាន​សម្រេច​ចិត្ត​ផ្គត់ផ្គង់​អ៊ុយក្រែន នូវ​ប្រព័ន្ធ​អាវុធ​ធុនស្រាល ប្រព័ន្ធប្រឆាំង​គ្រឿងសស្ត្រាវុធ និង​ប្រព័ន្ធ​ការពារ”។

“ទាហានចក្រភពអង់គ្លេសមួយចំនួនតូច ក៏នឹងផ្តល់ការបណ្តុះបណ្តាលដំណាក់កាលដំបូងសម្រាប់រយៈពេលខ្លីមួយផងដែរ មុនពេលត្រឡប់ទៅចក្រភពអង់គ្លេសវិញ”។

គួររម្លឹកថា ទាហានទីក្រុងមូស្គូរហូតដល់១០ម៉ឺននាក់ កំពុងឈរជើងនៅតាមព្រំដែន ដែលបង្កឲ្យមានការភ័យខ្លាចថា ការឈ្លានពានអាចកើតឡើងក្នុងរយៈពេលប៉ុន្មានថ្ងៃទៀត។

ទោះបីជាយ៉ាងណាក៏ដោយ វិមានក្រឹមឡាំង អះអាងថា ខ្លួនគ្មានផែនការវាយប្រហារទេ ប៉ុន្តែការបង្កើនកងទ័ព រថក្រោះ និងកាំភ្លើងធំ ធ្វើឲ្យគេយល់ឃើញផ្សេងពីនេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី អាចបាញ់កងទ័ពខ្លួនឯង ដើម្បីយកលេស វាយលុកអ៊ុយក្រែន ប៉ុន្មានថ្ងៃទៀត