ពិភពលោកទាំងមូលមានសង្ឃឹម! ទីបំផុតរកឃើញថ្នាំព្យាបាល អូមីក្រុង ហើយ

ថ្នាំលេបព្យាបាលជំងឺកូវីដ១៩ថ្មីរបស់ក្រុមហ៊ុន Pfizer បានបង្ហាញពីប្រសិទ្ធភាពប្រឆាំងនឹងវីរុសបំប្លែងខ្លួន អូមីក្រុង ក្នុងការធ្វើតេស្តមន្ទីរពិសោធន៍ ដែលនេះអាចជាអត្ថប្រយោជន៍ដល់ការប្រយុទ្ធប្រឆាំងនឹងរោគរាតត្បាត។

ក្រុមហ៊ុនដែលមានមូលដ្ឋាននៅទីក្រុងញូវយ៉កមួយនេះ បានបង្ហាញទិន្នន័យកាលពីថ្ងៃអង្គារទី១៨ខែមករា ដែលបង្ហាញថា វាជាថ្នាំដែលត្រូវបានអនុញ្ញាតដោយរដ្ឋបាលចំណីអាហារនិងឱសថអាមេរិក (FDA) ដើម្បីប្រយុទ្ធប្រឆាំងនឹងជំងឺកូវីដ១៩។ ថ្នាំគ្រាប់ Paxlovid បានបង្ហាញប្រសិទ្ធភាពនៅក្នុងការធ្វើតេស្តមន្ទីរពិសោធន៍ចំនួនបី។

វីរុសបំប្លែងខ្លួន អូមីក្រុង បានបង្ហាញពីសមត្ថភាពក្នុងការយកឈ្នះវ៉ាក់សាំង និងការព្យាបាល កូវីដ ចាប់តាំងពីវាបានបង្ហាញខ្លួនជាលើកដំបូងកាលពីឆ្នាំមុន។ ក្រុមហ៊ុនឱសថនានា បាននិងកំពុងធ្វើការដើម្បីកែសម្រួលវ៉ាក់សាំង និងការព្យាបាល ដើម្បីឲ្យមានប្រសិទ្ធភាពប្រឆាំងនឹងប្រភេទបម្រែបម្រួលថ្មីៗ។

លោកវេជ្ជបណ្ឌិត Michael Dolsten ប្រធានផ្នែកវិទ្យាសាស្ត្ររបស់ក្រុមហ៊ុន Pfizer បាននិយាយនៅក្នុងសេចក្តីថ្លែងការណ៍មួយថា “យើងបានផលិតថ្នាំ PAXLOVID យ៉ាងពិសេស ដើម្បីប្រយុទ្ធប្រឆាំងមេរោគឆ្លង ក៏ដូចជាវីរុសបំប្លែងខ្លួនគួរព្រួយបារម្ភនាពេលបច្ចុប្បន្ន ដែលមានសរសៃប្រូតេអ៊ីនខ្លាំងផងដែរ”។

លោកបន្ថែមថា ថ្នាំគ្រាប់នេះ បានបង្ហាញពីសមត្ថភាព កាត់បន្ថយហានិភ័យនៃការចូលមន្ទីរពេទ្យឬការស្លាប់ដោយសារមេរោគបាន ៩០ភាគរយ ប្រសិនបើលេប ពេលឆ្លងដំបូង។

ថ្នាំនេះត្រូវតម្រូវឲ្យលេបពីរដងក្នុងមួយថ្ងៃ សម្រាប់រយៈពេលប្រាំថ្ងៃ។ អ្នកដែលមានហានិភ័យខ្ពស់ គួរតែលេបវានៅពេលដឹងថា ខ្លួនឆ្លងវីរុស ដើម្បីការពារស្ថានភាពរបស់ពួកគេមិនឲ្យកាន់តែយ៉ាប់យ៉ឺន៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ WHO ព្រមានចំៗ អូមីក្រុង មិនស្រាលទេ កុំយល់ខុសឲ្យសោះ