Pfizer សារភាពថា ក្រុមហ៊ុនមិនបានធ្វើតេស្តវ៉ាក់សាំងកូវីដទេ មុនពេលចែកចាយលើទីផ្សារ

មន្ត្រីជាន់ខ្ពស់មួយរូបនៃក្រុមហ៊ុនឱសថដ៏ធំ Pfizer បានធ្វើការសារភាពដ៏គួរឲ្យភ្ញាក់ផ្អើលជាទីបំផុតថា ក្រុមហ៊ុនមិនមានព័ត៌មានថាតើវ៉ាក់សាំងបង្ការជំងឺកូវីដ១៩របស់ខ្លួន អាចការពារការចម្លងមេរោគ SARS-CoV-2 បានដែរឬក៏អត់នោះទេ នៅពេលខ្លួនចាប់ផ្តើមចែកចាយនៅលើទីផ្សារ។

កាលពីថ្ងៃចន្ទទី១០ ខែតុលា ដើមសប្តាហ៍នេះ លោកស្រី Janine Small បានផ្តល់សក្ខីកម្មនៅចំពោះមុខគណៈកម្មាធិការកូវីដពិសេសរបស់សភាអឺរ៉ុប ជំនួសលោក Albert Bourla នាយកប្រតិបត្តិ Pfizer ដែលបានដកខ្លួនចេញ។

ក្នុងអំឡុងពេលផ្តល់សក្ខីកម្ម លោកស្រី Small ត្រូវបានសួរដោយសមាជិកសភាអឺរ៉ុប ជនជាតិហូឡង់ឈ្មោះ Rob Roos អំពីសមត្ថភាពការពារការចម្លងកូវីដរបស់វ៉ាក់សាំងនេះ។

លោក Roos ​សួរថា “តើវ៉ាក់សាំងបង្ការកូវីដរបស់ Pfizer ត្រូវបានធ្វើតេស្តលើការរារាំងការចម្លងមេរោគទេ មុនពេលចែកចាយលើទីផ្សារ? សូមនិយាយឲ្យច្បាស់។ ប្រសិនបើមែន តើអ្នកសុខចិត្តចែករំលែកទិន្នន័យជាមួយគណៈកម្មាធិការនេះដែរឬទេ? ​ខ្ញុំចង់​បាន​ចម្លើយ​ត្រង់​”។

លោកស្រី Small ដែលជាប្រធានផ្នែកទីផ្សារអភិវឌ្ឍន៍អន្តរជាតិរបស់ក្រុមហ៊ុន Pfizer បាននិយាយថា នៅពេលដែលក្រុមហ៊ុនកំពុងដាក់ចែកចាយវ៉ាក់សាំងបង្ការកូវីដនៅទូទាំងពិភពលោក ក្រុមហ៊ុនត្រូវតែដើរឲ្យទាន់វិទ្យាសាស្រ្ត។

ទាក់​ទង​នឹង​សំណួរអំពីថាតើ វ៉ាក់សាំង Pfizer mRNA ធ្លាប់ត្រូវបានធ្វើតេស្ត អំពីសមត្ថភាពរបស់ខ្លួនក្នុងការទប់ស្កាត់ការចម្លងកូវីដដែរឬទេ មុនពេលចាក់ជូនសាធារណជនទូទៅនោះ លោកស្រី Small បានឆ្លើយតប ដោយទទួលស្គាល់ថា ក្រុមហ៊ុនមិនបានធ្វើតេស្តទេ។

លោកស្រី Small បន្តថា “ក្រុមហ៊ុន Pfizer ត្រូវតែដើរឲ្យទាន់វិទ្យាសាស្រ្ត ដើម្បីយល់ពីអ្វីដែលកំពុងកើតឡើងនៅក្នុងទីផ្សារ ហើយតាមទស្សនៈនោះ យើងត្រូវធ្វើអ្វីគ្រប់យ៉ាងដែលមានហានិភ័យ”។

ក្រោយមក សមាជិកសភាអឺរ៉ុប ហូឡង់ បានហៅការសារភាពរបស់ Pfizer ថាជា “រឿងអាស្រូវគ្មានកេរ្តិ៍ខ្មាស”។ លោកនិយាយថា​ មនុស្សរាប់លាននាក់នៅទូទាំងពិភពលោក មានអារម្មណ៍ថាត្រូវបានគេបង្ខំឲ្យចាក់វ៉ាក់សាំង។ ឥឡូវ​នេះ វា​បាន​ក្លាយ​ទៅ​ជា​ការ​កុហក​ដ៏ថោកទាបជាទីបំផុត៕

ប្រែសម្រួល៖ Vann Vann

ប្រភព៖ Times Now News, Medika.Life

ចុចអាន៖ Pfizer អនុញ្ញាតឲ្យប្រទេសកំពុងអភិវឌ្ឍ ផលិតនិងលក់ថ្នាំគ្រាប់ព្យាបាលកូវីដ