ចិន និងប៉ាគីស្ថាន ធ្វើសមយុទ្ធដែនអាកាសរួមគ្នា

សេចក្តីថ្លែងការណ៍ផ្លូវការមួយបាននិយាយថា សមយុទ្ធរួមគ្នារវាងកងទ័ពអាកាសប៉ាគីស្ថាន និងចិនបានចាប់ផ្តើមនៅក្នុងប្រទេសប៉ាគីស្ថានកាលពីថ្ងៃពុធ ។

យោងតាមកងទ័ពអាកាសប៉ាគីស្ថាន (PAF) បានឲ្យដឹងថា សមយុទ្ធដែនអាកាស Shaheen-IX នៃជុំទី ៩ ដែលធ្វើឡើងជារៀងរាល់ឆ្នាំបានចាប់ផ្តើមនៅឯមូលដ្ឋានប្រតិបត្តិការអាកាសប៉ាគីស្ថាន ។

ទន្ទឹមនោះអ្នកចូលរួមក្នុងកងអនុសេនាធំនៃកងកម្លាំងអាកាសរបស់ទ័ពរំដោះប្រជាជនចិន (PLAAF) រួមមានអ្នកបើកយន្តហោះប្រយុទ្ធ អ្នកគ្រប់គ្រង និងការពារអាកាស និងនាវិកបញ្ជាបច្ចេកទេសនៅលើដីជាដើម ។

បន្ថែមពីនេះពិធីបើកត្រូវបានចូលរួមដោយអនុសេនាធិការដែនអាកាសរបស់កងទ័ពអាកាសប៉ាគីស្ថាន (PAF) លោក Waqas Ahmed Sulehri និងឧត្តមសេនីយ៍ឯក Sun Hong កងកម្លាំងអាកាសរបស់ចិន (PLAAF) ។

ខណៈពេលដែលលោក Sun បាននិយាយថា សមយុទ្ធនេះនឹងធ្វើឲ្យប្រសើរឡើងនូវកម្រិតនៃការហ្វឹកហាត់ប្រយុទ្ធ និងពង្រឹងកិច្ចសហប្រតិបត្តិការជាក់ស្តែងរវាងកងទ័ពអាកាសទាំងពីរ លោក Sulehri បានអះអាងថា វានឹងផ្តល់នូវឱកាសដើម្បីបង្កើនអន្តរប្រតិបត្តិការនៃកងទ័ពអាកាសទាំងពីរ ក៏ដូចពង្រឹងទំនាក់ទំនងទ្វេភាគីជាដើម ។

កាលពីខែមុនសម្ព័ន្ធមិត្តយូរមកហើយទាំងពីរនេះបានចុះហត្ថលេខាលើអនុស្សារណៈយោគយល់គ្នាដើម្បីពង្រឹងកិច្ចសហប្រតិបត្តិការការពារជាតិទ្វេភាគី ។ កិច្ចព្រមព្រៀងនេះត្រូវបានធ្វើឡើងក្នុងអំឡុងពេលដំណើរទស្សនកិច្ចរបស់រដ្ឋមន្រ្តីការពារជាតិចិនលោកឧត្តមសេនីយ៍ Wei Fenghe ទៅកាន់ប្រទេសប៉ាគីស្ថាន ។

ប៉ាគីស្ថាន និងចិនមានភាពជាដៃគូយុទ្ធសាស្ត្ររួចទៅហើយ ហើយការផ្លាស់ប្តូរថ្មីៗនៅក្នុងតំបន់បានជំរុញឲ្យសម្ព័ន្ធមិត្តទាំងពីរធ្វើសហប្រតិបត្តិការយ៉ាងជិតស្និទ្ធជាមួយគ្នារឹតតែខ្លាំងជាងមុនផងដែរ ។

ដំណើរទស្សនកិច្ចរបស់លោក Wei ត្រូវបានគេមើលឃើញថាមានសារៈសំខាន់ នៅពេលមានជម្លោះព្រំដែនដែលកំពុងបន្តរវាងចិន និងឥណ្ឌានៅតាមព្រំដែនហិម៉ាល័យក៏ដូចជាការពង្រឹងទំនាក់ទំនងយុទ្ធសាស្ត្ររវាងឥណ្ឌា និងសហរដ្ឋអាមេរិក ៕

ប្រែសម្រួលដោយ ៖ ជីវ័ន្ត

ប្រភព ៖ AA (Anadolu Agency)