មហា​​សេដ្ឋី​​អូស្ត្រាលី​​ដាក់​​ប្រឹង​ Facebook​ ពី​​បទ​ឆបោក​តាម​ការផ្សាយពាណិជ្ជកម្ម​

មហាសេដ្ឋីរ៉ែរបស់ប្រទេសអូស្ត្រាលី​ លោក​ Andrew​ Forrest​ បាន​និយាយ​នៅ​ថ្ងៃព្រហស្បតិ៍នេះថា លោកបានកំពុងចាត់វិធានការផ្លូវច្បាប់លើក្រុមហ៊ុន Meta Platform Inc (Facebook) ទៅតុលាការប្រទេសអូស្ត្រាលីដោយចោទប្រកាន់ពីបទបំពានច្បាប់លាងលុយ និងបានប្រើប្រាស់មុខងាររបស់ខ្លួនបោកប្រាសពលរដ្ឋអូស្ត្រាលី។

លោក Forrest ដែលជាអ្នកមានបំផុតរបស់អូស្ត្រាលី និងជាអគ្គនាយកក្រុមហ៊ុន Fortescue Metals Group បាននិយាយថា លោកបានកំពុងចាត់វិធានការដើម្បីបញ្ឈប់មនុស្សដែលកំពុងបាត់បង់ប្រាក់តាមរយៈការផ្សាយពាណិជ្ជកម្មបោកប្រាស ដូចជាការប្រើប្រាស់រូបភាពរបស់លោកដើម្បីផ្សព្វផ្សាយគម្រោង​រូបិយប័ណ្ណគ្រីបតូ​ជា​ដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក្យបណ្តឹងត្រូវបានលោក Forrest ដាក់ទៅតុលាការ Magistrates នៅ​ភាគ​ខាងលិចអូស្ត្រាលីដោយចោទប្រកាន់ Facebook ពីបទបរាជ័យក្នុងការគ្រប់គ្រង ឬវប្បធម៌សហការដើម្បីការពារប្រព័ន្ធរបស់ខ្លួនដែលត្រូវបានប្រើក្នុងការប្រព្រឹត្តបទឧក្រិដ្ឋកម្ម។

ពាក្យបណ្តឹងក៏បានចោទ Facebook ខ្វះការប្រុងប្រយ័ត្នដោយគ្មានវិធានការប្រសិទ្ធភាពដើម្បីបញ្ឈប់បទឧក្រិដ្ឋពីការប្រើបណ្តាញទំនាក់ទំនងរបស់ខ្លូនដើម្បីឆបោកតាមរយៈការផ្សាយពាណិជ្ជកម្ម​ដល់​​អ្នកប្រើប្រាស់។

ពាក្យបណ្តឹងបានកើតមានឡើង បន្ទាប់ពីលោក Forrest បាននិយាយថា លោកមានសំណើរជាច្រើនដោយ​បាន​ស្នើឲ្យ Facebook ការពាររូបថតរបស់លោកដែលត្រូវបានប្រើប្រាស់ដើម្បីផ្សព្វផ្សាយផែនការវិនិយោគ ក្នុងនោះមានទាំងលិខិតបើកចំហរមួយទៅនាយកប្រតិបត្តិលោក Mark Zuckerberg កាលពីខែវិច្ឆិកា ឆ្នាំ២០១៩។

Facebook ដែលបានប្តូរឈ្មោះជា Meta កាលពីឆ្នាំមុនបានបដិសេធធ្វើអត្ថាធិប្បាយជុំ​វិញ​ពាក្យបណ្តឹងនេះ ប៉ុន្តែបាននិយាយថា ជាទូទៅ ខ្លួនតែងតែប្រើ «វិធីសាស្រ្តចម្រុះ» ដើម្បីបញ្ឈប់ការផ្សាយពាណិជ្ជកម្មបែបនេះ ហើយបានរារាំងអ្នកផ្សាយពាណិជ្ជកម្ម៕

ប្រែសម្រួល៖ វីរបុត្រ
ប្រភព៖ reuters