ព័ត៌មានអន្ដរជាតិ

ក្រោយចូលឆ្នាំចិន វៀតណាមឆ្លងកូវីដច្រើនណាស់ ព្រមានប្រព័ន្ធសុខាភិបាលដុនដាប

បានផុស

២ years មុន

នៅ

ថ្ងៃព្រហស្បតិ៍ ១០ កុម្ភៈ ២០២២

ដោយ

ប្រទេសវៀតណាមនៅថ្ងៃព្រហស្បតិ៍នេះបានព្រមានថា ប្រព័ន្ធសុខាភិបាលរបស់ខ្លួនអាចនឹងលើសលប់ដោយអ្នកជំងឺ បន្ទាប់ពីករណីឆ្លងកូវីដ-១៩ប្រចាំថ្ងៃកំពុងកើនឡើង ក្រោយពេលពិធីបុណ្យចូលឆ្នាំថ្មី។

ប្រទេសអាស៊ានមួយនេះមានអ្នកឆ្លងថ្មីជិត២៤០០០នាក់កាលពីថ្ងៃអង្គារ៍ បើប្រៀបធៀបនឹងចំនួនប្រហែលជា១៥០០០នាក់ក្នុងមួយៗថ្ងៃក្នុងសប្តាហ៍មុនពេលបុណ្យចូលឆ្នាំថ្មីប្រពៃណីចិនជាពេលវេលាមនុស្សរាប់លាននាក់ធ្វើដំណើរទៅស្រុកកំណើត និងដើរកម្សាន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងសុខាភិបាលវៀតណាមបាននិយាយក្នុងសេចក្តីថ្លែងការណ៍មួយថា ៖«ការធ្វើដំណើរកើនឡើងនាំឲ្យប្រឈមហានិភ័យនៃការឆ្លងកាន់តែច្រើននៅក្នុងសហគមន៍ ក្នុងនោះមានហានិភ័យនៃការរាលដាលវីរុសបំប្លែងខ្លួន Omicron»។

«ប្រសិនបើមិនមានការគ្រប់គ្រងល្អទេ ចំនួននៃករណីឆ្លងច្រើននឹងកើនឡើង នឹងដាក់សម្ពាធលើប្រព័ន្ធសុខាភិបាល ហើយបណ្តាលឲ្យស្លាប់កាន់តែច្រើន»។

ការហោះហើរក្នុងស្រុកបានបន្ថែមលើការហោះហើរពេលរាត្រីកំឡុងពេលថ្ងៃឈប់សម្រាកនៃពិធីបុណ្យ ដោយសារព្រលានយន្តហោះធំបំផុតពោរពេញដោយអ្នកដំណើរ។ នេះបើយោងតាមសេចក្តីប្រកាសដាក់ដោយឡែកមួយរដ្ឋាភិបាល។

បន្ទាប់ពីរីករាយចំពោះវិធានការរបស់ខ្លួនក្នុងការទប់កូវីដតាមរយៈការធ្វើតេស្តទ្រង់ទ្រាយធំ និងរឹតបណ្តឹងចំពោះការតាមដានអ្នកពាក់ព័ន្ធជាមួយអ្នកឆ្លងកាលពីឆ្នាំទី១នៃកូវីដផ្ទុះឡើង វៀតណាមបានទទួលរងជាថ្មីនៃការឆ្លង និងការស្លាប់កាលពីខែឧសភា ឆ្នាំមុន ដែលជំរុញឲ្យប្រឹងប្រែងក្នុងការចាក់វ៉ាក់សាំង។

ទន្ទឹមជាមួយគ្នានេះ ដោយសារមន្ទីររដ្ឋទទួលរងបន្ទុកខ្លាំងពេក រដ្ឋាភិបាលបានអំពាវនាវឲ្យមន្ទីរពេទ្យឯកជនជួយព្យាបាលអ្នកជំងឺកូវីដ។

រហូតដល់ពេលនេះ វៀតណាមមានអ្នកឆ្លងកូវីដ-១៩សរុប២.៤លាននាក់ និងស្លាប់ជាង៣៨០០០នាក់។ ចំណែកចំនួនចាក់វ៉ាក់សាំងវិញ ពេលនេះប្រទេសជិតខាងកម្ពុជាមួយនេះបានចាក់វ៉ាក់សាំងដល់ប្រជាជនរបស់ខ្លួនបាន៣ភាគ៤នៃប្រជាជនរបស់ខ្លួន៩៨លាននាក់៕

ប្រែសម្រួល៖ វីរបុត្រ
ប្រភព៖ Reuters