ព័ត៌មានអន្ដរជាតិ

ខ្មាន់កាំភ្លើងបាញ់នាយករដ្ឋមន្ត្រី លីប៊ី ក្នុងរថយន្ត មុនថ្ងៃបោះឆ្នោត

បានផុស

៣ years មុន

នៅ

ថ្ងៃព្រហស្បតិ៍ ១០ កុម្ភៈ ២០២២

ដោយ

យោងតាមប្រភពព័ត៌មានបានឲ្យដឹងថា ខ្មាន់កាំភ្លើងបានបើកការបាញ់ប្រហារលើក្បួនរថយន្តរបស់នាយករដ្ឋមន្ត្រីលីប៊ីលោក Abdulhamid Dbeibah នៅក្នុងរដ្ឋធានីទ្រីប៉ូលី មុនពេលការបោះឆ្នោតដើម្បីរកអ្នកជំនួសគាត់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពបានប្រាប់ Al Jazeera ថា ការវាយប្រហារនេះបានកើតឡើងនៅព្រឹកថ្ងៃព្រហស្បតិ៍នេះ ខណៈដែលមេដឹកនាំបណ្តោះអាសន្នរូបនេះកំពុងត្រឡប់ទៅផ្ទះវិញ ។ គ្រាប់កាំភ្លើងមួយគ្រាប់បានបាញ់ចូលកញ្ចក់រថយន្តរបស់លោកនាយករដ្ឋមន្ត្រី ប៉ុន្តែគាត់ និងអ្នកបើកបរបានគេចខ្លួនដោយគ្មានរបួស ។

ប្រភពរបស់ Al Jazeera បាននិយាយថា គ្រាប់កាំភ្លើងត្រូវបានបាញ់ចេញពីអាវុធធុនស្រាល ហើយអគ្គរដ្ឋអាជ្ញាលីប៊ីដែលកំពុងបើកការស៊ើបអង្កេតលើការវាយប្រហារនេះបាននិយាយថា វាគឺជាការប៉ុនប៉ងធ្វើឃាតនាយករដ្ឋមន្ត្រី ។

ការវាយប្រហារនេះកើតឡើង ចំពេលដែលមានការឈ្លោះប្រកែកគ្នាយ៉ាងខ្លាំងជុំវិញការគ្រប់គ្រងរបស់រដ្ឋាភិបាលរបស់លោក Dbeibah ដែលត្រូវបានតែងតាំងជាមេដឹកនាំបណ្តោះអាសន្នកាលពីឆ្នាំមុន ។

គួរបញ្ជាក់ថា ប្រទេសលីប៊ីមានសន្តិភាព ឬភាពនឹងនរតិចតួចណាស់ ចាប់តាំងពីការបះបោរដែលគាំទ្រដោយអង្គការណាតូប្រឆាំងនឹងអតីតមេដឹកនាំលោក Muammar Gaddafi នៅក្នុងឆ្នាំ ២០១១ ខណៈក្នុងឆ្នាំ ២០១៤ ប្រទេសនេះបានបែកបាក់គ្នារវាងបក្សពួកនិយមនៅភាគខាងកើត និងខាងលិច ៕