រុស្ស៊ី ហោះហើរយន្តហោះទម្លាក់គ្រាប់បែក ១០ គ្រឿងលើតំបន់ គ្រីមៀ

កងនាវាចរសមុទ្រខ្មៅរបស់រុស្ស៊ីបាននិយាយនៅថ្ងៃសុក្រនេះថា យន្តហោះទម្លាក់គ្រាប់បែក Su-24 ចំនួន ១០ គ្រឿងរបស់ខ្លួនត្រូវបានដាក់ពង្រាយឡើងវិញលើវាលយន្តហោះតំបន់ គ្រីមៀ ដើម្បីហោះហើរទៅដាក់នៅតំបន់ផ្សេងទៀតនៃប្រទេសរុស្ស៊ី អំឡុងពេលសមយុទ្ធយោធា ។

ដោយអនុលោមតាមផែនការហ្វឹកហ្វឺនសម្រាប់កងកម្លាំងប្រដាប់អាវុធរុស្ស៊ីសម្រាប់ឆ្នាំ ២០២២ សមយុទ្ធកងទ័ពជើងទឹកជាបន្តបន្ទាប់កំពុងត្រូវបានធ្វើឡើងនៅគ្រប់ផ្នែកនៃការទទួលខុសត្រូវរបស់កងនាវានៅក្នុងខែមករា និងខែកុម្ភៈ ។

ក្នុងរយៈពេលប៉ុន្មានខែកន្លងមកនេះ ប្រទេសលោកខាងលិច និងអ៊ុយក្រែនបានចោទប្រកាន់រុស្ស៊ីពីការប្រមូលផ្តុំកងទ័ពនៅជិតព្រំដែនអ៊ុយក្រែនក្នុងការរៀបចំសម្រាប់សកម្មភាពយោធាណាមួយ ។

ប៉ុន្តែរុស្ស៊ីបានឆ្លើយតបថា ខ្លួនមិនមានចេតនាធ្វើសកម្មភាពយោធាលើអ៊ុយក្រែននោះទេ ហើយបានសង្កត់ធ្ងន់ថា រុស្ស៊ីមានសិទ្ធិចល័តកងកម្លាំងនៅក្នុងទឹកដីរបស់ខ្លួន ។

រុស្សីក៏បានសម្តែងការព្រួយបារម្ភអំពីសកម្មភាពយោធារបស់ណាតូនៅជិតព្រំដែនរបស់ខ្លួន និងការគាំទ្រផ្នែកយោធាដែលកំពុងបន្តរបស់អ៊ុយក្រែន រួមទាំងការកើនឡើងនៃចំនួនគ្រូបង្ហាត់មកពីលោកខាងលិចនៅក្នុងតំបន់ Donbass ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ស្ថានភាពកាន់តែក្ដៅ ទូតរង អាមេរិក ចាកចេញពី រុស្ស៊ី