លោក បៃដិន ថា ប្រជាជនអាមេរិកកុំខ្លាចសង្គ្រាមនុយក្លេអ៊ែរជាមួយ រុស្ស៊ី លើ អ៊ុយក្រែន

ប្រធានាធិបតីអាមេរិកលោក ចូ បៃដិន បាននិយាយកាលពីថ្ងៃចន្ទថា លោកមិនជឿថា ជនជាតិអាមេរិកមានហេតុផលណាគួរឲ្យព្រួយបារម្ភអំពីសង្គ្រាមនុយក្លេអ៊ែរ ចំពេលមានភាពតានតឹងជាមួយរុស្ស៊ីជុំវិញការលុកលុយរបស់ខ្លួនលើអ៊ុយក្រែននោះទេ ។

លោក បៃដិន បានឆ្លើយតបទៅនឹងសំណួរជាច្រើន ប៉ុន្តែជាមួយនឹងចម្លើយយ៉ាងខ្លីប៉ុណ្ណោះថា “ទេ” បន្ទាប់ពីថ្លែងសុន្ទរកថានៅក្នុងព្រឹត្តិការណ៍ Black History Month នៅឯសេតវិមាន ។

គួររំឭកថា ប្រធានាធិបតីរុស្ស៊ីលោក វ្ល៉ាឌីមៀ ពូទីន កាលពីថ្ងៃអាទិត្យបានបញ្ជាឲ្យកងកម្លាំងអាវុធនុយក្លេអ៊ែររបស់ប្រទេសត្រូវត្រៀមខ្លួនមែនទែន និងមានការប្រុងប្រយ័ត្នខ្ពស់ ខណៈដែលប្រទេសលោកខាងលិច បង្កើនការដាក់ទណ្ឌកម្មលើការលុកលុយរបស់រុស្ស៊ីលើអ៊ុយក្រែន ។

ភ្លាមៗនោះរដ្ឋបាលលោក បៃដិន បានឆ្លើយតបយ៉ាងខ្លាំងដោយឲ្យចៀសវាងផ្ទុះភាពតានតឹងបន្ថែមទៀត ដោយហៅសកម្មភាពរបស់លោក ពូទី ថាជាការប៉ុនប៉ងដើម្បីបង្ហាញពីភាពត្រឹមត្រូវនៃការលុកលុយរបស់រុស្ស៊ីបន្ថែមទៀត ខណៈអាមេរិកខ្លួនឯងផ្ទាល់មិនបានដាក់កម្លាំងនុយក្លេអ៊ែរណាមួយឲ្យមានការប្រុងប្រយ័ត្នខ្ពស់ក្នុងការឆ្លើយតបទៅវិញនោះទេ ។

ចំណែកលោកស្រី Jen Psaki អ្នកនាំពាក្យសេតវិមានបាននិយាយប្រាប់ទូរទស្សន៍ ABC កាលពីថ្ងៃអាទិត្យថា “នេះពិតជាគំរូមួយ ដែលយើងបានឃើញពីលោកប្រធានាធិបតី ពូទីន តាមរយៈដំណើរនៃជម្លោះនេះ ពោលជាការគម្រាមកំហែងដែលមិនធ្លាប់មានពីមុនដើម្បីបង្ហាញអំពីភាពត្រឹមត្រូវនៃការការលុកលុយបន្ថែមទៀត ហើយសហគមន៍ពិភពលោក និងប្រជាជនអាមេរិកគួរតែពិនិត្យមើលវាតាមរយៈសកម្មភាពនេះ” ៕

ប្រែសម្រួលដោយ ៖ ជីវ័ន្ត

ប្រភព ៖ The Hill

ចុចអាន ៖ តួអង្គសំខាន់ៗនៅពីក្រោយលោក ពូទីន ក្នុងការវាយលុក អ៊ុយក្រែន