អ្នកស្ម័គ្រចិត្តបរទេស ២ ម៉ឺននាក់ទៅ អ៊ុយក្រែន ប្រយុទ្ធជាមួយទ័ព រុស្ស៊ី (មានវីដេអូ)

រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយកាលពីថ្ងៃអាទិត្យថា អ្នកស្ម័គ្រចិត្តអន្តរជាតិប្រហែល ២០,០០០ នាក់បានធ្វើដំណើរទៅកាន់ប្រទេសអ៊ុយក្រែនដើម្បីចូលរួមក្នុងការប្រយុទ្ធប្រឆាំងនឹងការលុកលុយរបស់កងកម្លាំងរុស្ស៊ី ។

លោក Kuleba បានប្រាប់ទូរទស្សន៍ CNN របស់សហរដ្ឋអាមេរិកថា “ពួកគេមកពីប្រទេសជាច្រើនផ្សេងគ្នា ហើយភាគច្រើននៅអឺរ៉ុប ។ មនុស្សជាច្រើននៅលើពិភពលោកស្អប់រុស្ស៊ី និងអ្វីដែលខ្លួនកំពុងធ្វើក្នុងប៉ុន្មានឆ្នាំចុងក្រោយនេះ ប៉ុន្តែគ្មាននរណាម្នាក់ហ៊ានប្រឆាំងដោយបើកចំហ និងប្រឆាំងនឹងពួកគេនោះទេ” ។

លោកបាននិយាយថា “ដូច្នេះនៅពេលដែលប្រជាជនមើលឃើញថា អ៊ុយក្រែនកំពុងប្រយុទ្ធ ប្រជាជនអ៊ុយក្រែនមិនចុះចាញ់ មនុស្សជាច្រើនមានអារម្មណ៍ថា ពួកគេមានការលើកទឹកចិត្តដើម្បីចូលរួមក្នុងការប្រយុទ្ធ ហើយនាំប្រទេសរុស្ស៊ីឲ្យទទួលខុសត្រូវចំពោះការលុកលុយរបស់ខ្លួន” ។

លោកបញ្ជាក់ថា វាពិតជាមានសារៈសំខាន់បំផុតក្នុងការទទួលបានការគាំទ្រប្រកបដោយចីរភាព នយោបាយ សេដ្ឋកិច្ច និងយោធាពីជុំវិញពិភពលោក ។

គួររំឭកថា កាលពីចុងខែមុន នៅពេលចាប់ផ្តើមនៃការលុកលុយរបស់រុស្ស៊ី ប្រធានាធិបតីអ៊ុយក្រែនលោក Volodymyr Zelensky បានបើកចំហរឲ្យជនបរទេសមកប្រទេសរបស់គាត់ដើម្បីបង្កើតជាផ្នែកនៃ “កងពលអន្តរជាតិ” ដែលនឹងប្រយុទ្ធជាមួយអ៊ុយក្រែនប្រឆាំងរុស្ស៊ី ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ SCMP

ចុចអាន ៖ មេទ័ពអង្គការ “Neo-nazi” រុស្ស៊ី ល្បីខាងធ្វើទារុណកម្ម និងប្រហារជីវិត ត្រូវបាញ់សម្លាប់នៅ អ៊ុយក្រែន