ថៃអនុញ្ញាតឲ្យប្រជាជនប្រារព្ធពិធីឆ្លងឆ្នាំថ្មី តែត្រូវគោរពតាមគោលការណ៍ទាំងនេះ

លោក Anutin Charnvirakul ឧបនាយករដ្ឋមន្រ្តី និងជារដ្ឋមន្រ្តីសុខភាពសាធារណៈនៃប្រទេសថៃនៅថ្ងៃចន្ទនេះបានជំរុញឲ្យប្រជាជនថៃប្រកាន់ខ្ជាប់យ៉ាងម៉ឺងម៉ាត់ចំពោះការធ្វើគម្លាតសង្គម និងគោលការណ៍សុខភាពផ្សេងទៀតដើម្បីទប់ស្កាត់ការរីករាលដាលនៃជំងឺកូវីដ ១៩ ក្នុងការប្រារព្ធពិធីឆ្លងឆ្នាំថ្មីខាងមុខនេះ ។

លោក Anutin បាននិយាយថា អាជ្ញាធរនឹងមិនបញ្ឈប់ប្រជាជនមិនឲ្យរៀបចំ ឬចូលរួមក្នុងពិធីអបអរឆ្លងឆ្នាំថ្មី និងព្រឹត្តិការណ៍រាប់ថយក្រោយនោះទេ ប៉ុន្តែប្រជាជននឹងត្រូវគោរពយ៉ាងតឹងរ៉ឹងនូវការរឹតត្បិតនៃច្បាប់ការពារជំងឺកូវីដ ១៩ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្រ្តីក្រសួងសុខភាពសាធារណៈបាននិយាយថា វិធានការណ៍ប្រឆាំងនឹងរោគរាតត្បាតអំពាវនាវឲ្យអ្នកចូលឆ្នាំថ្មីទាំងអស់ត្រូវពិនិត្យសីតុណ្ហភាពរាងកាយរបស់ពួកគេដើម្បីរកមើលជំងឺគ្រុនក្ដៅ ពាក់ម៉ាស លាងដៃជាមួយជែល ឬអាល់កុល និងរក្សាគម្លាតគ្នាទៅវិញទៅមក ។

ទន្ទឹមនឹងនេះដែរលោក Anutin បាននិយាយថា អាជ្ញាធរនៅភាគឦសាននៃខេត្ត Nakhon Ratchasima ដែលការប្រគុំតន្រ្តីដ៏ធំមួយត្រូវបានធ្វើឡើងនៅជិតឧទ្យានជាតិ Khao Yai កាលពីចុងសប្តាហ៍មិនទាន់ចាត់វិធានការតាមផ្លូវច្បាប់ប្រឆាំងនឹងអ្នករៀបចំការប្រគំតន្ត្រីនៅឡើយទេសម្រាប់ការបើកឲ្យចូលទស្សនារហូតដល់ទៅ ៨ ម៉ោង ។

យោងតាមលោករដ្ឋមន្ត្រីបានឲ្យដឹងថា អ្នកទស្សនាការប្រគំតន្ត្រីជាច្រើនខកខានមិនបានពាក់ម៉ាស និងមិនអើពើនឹងច្បាប់គម្លាតសង្គមជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA