ឥណ្ឌូណេស៊ី អាចបន្ធូរបន្ថយការរឹតត្បិតនៅសប្ដាហ៍ក្រោយ ទោះករណីឆ្លងកូវីដបន្តកើតមានខ្ពស់ក៏ដោយ

ប្រធានាធិបតីឥណ្ឌូណេស៊ីលោក Joko Widodo បានស្នើឲ្យបន្ធូរបន្ថយការរឹតបន្តឹងពាក់ព័ន្ធនឹងជំងឺកូវីដ ១៩ នៅសប្តាហ៍ក្រោយ ទោះបីជាករណីឆ្លងនៅតែបន្តកើតមានខ្ពស់នៅក្នុងប្រទេសក៏ដោយ ។

ប្រទេសឥណ្ឌូណេស៊ីបានបញ្ជាក់ពីករណីឆ្លងថ្មីចំនួន ៣៨,៣២៥ ករណី និងស្លាប់ ១,២៨០ នាក់កាលពីថ្ងៃអង្គារ ដែលជាចំនួនខ្ពស់បំផុតទី ២ គិតមកទល់ពេលនេះ ខណៈករណីឆ្លងដែលកំពុងកើនឡើងនេះ ក៏មានចំណែកនៃវីរុសបំប្លែងខ្លួនឥណ្ឌា “Delta” ផងដែរ ។

ការរឹតត្បិតដ៏តឹងរ៉ឹង ដែលត្រូវបានធ្វើឡើងចាប់តាំងពីថ្ងៃទី ៣ ខែកក្កដា ត្រូវបានបញ្ចប់កាលពីថ្ងៃអង្គារនៅកោះជ្វា ដែលជាទីក្រុងនៃរដ្ឋធានីហ្សាការតា និងក្នុងគោលដៅទេសចរណ៍ឈានមុខគេនៅកោះបាលី ។ វិធានការរឹតត្បិតនេះរួមមាន បុគ្គលិកនៃអាជីវកម្មដែលមិនចាំបាច់ ត្រូវធ្វើការពីផ្ទះ ។

លោក Joko Widodo បាននិយាយកាលពីថ្ងៃអង្គារថា ការរឹតត្បិត នឹងត្រូវបន្តរហូតដល់ថ្ងៃអាទិត្យ ប៉ុន្តែលោកចង់សម្រួលដល់ពួកគេ ដោយបន្ថូរបន្ថយការរឹតត្បិតនៅសប្តាហ៍ក្រោយ ប្រសិនបើករណីឆ្លងធ្លាក់ចុះ ។

ទន្ទឹមនោះ សមាជិកគណៈរដ្ឋមន្រ្តីមួយចំនួនបានលើកឡើងថា វិធានការនេះអាចត្រូវបានពន្យារពេលជាច្រើនសប្តាហ៍ទៀត ។ ប៉ុន្តែលោក Joko Widodo កាលពីសប្តាហ៍មុនបានហៅបញ្ហានេះថាជា បញ្ហាពិបាកដោះស្រាយណាស់ ដោយបានបង្ហាញពីក្តីបារម្ភរបស់លោក ចំពោះផលប៉ះពាល់អវិជ្ជមានដល់សេដ្ឋកិច្ច ។

បន្ថែមពីនេះ លោកប្រធានាធិបតីក៏រងការរិះគន់ពីអ្នកជំនាញផងដែរ ដោយនិយាយថា លោកកំពុងដាក់សេដ្ឋកិច្ចនាំមុខសុខភាពរបស់ប្រជាជន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ទោះ​កូវីដ​ផ្ទុះខ្លាំង ក៏​ពល​រដ្ឋ ឥណ្ឌូណេស៊ី​ រាប់លាន​នាក់​នៅតែ​ប្រារព្ធ​ពិធី Eid al-Adha