ប៉ម Eiffel ប្រទេសបារាំង កើនកម្ពស់ ៦ម៉ែត្រ ព្រោះរឿងមួយ

ប៉ម Eiffel របស់ប៉ារីស ប្រទេសបារាំង បានកើនកម្ពស់ ៦ម៉ែត្រ (១៩.៦៩ ហ្វីត) ទៀត កាលពីថ្ងៃអង្គារ ទី១៥ ខែមីនា​ ឆ្នាំ២០២២ បន្ទាប់ពីអង់តែនវិទ្យុឌីជីថលថ្មីមួយត្រូវបានភ្ជាប់ទៅកំពូលនៃប៉មនេះ។

យោងតាមការចុះផ្សាយពី Reuters បានឱ្យដឹងថា ប៉មនេះត្រូវបានសាងសង់ឡើងដោយ Gustave Eiffel នៅចុងសតវត្សទី១៩ ដែលច្ចុប្បន្ននេះវាមានកម្ពស់ ៣៣០ម៉ែត្រ បន្ទាប់ពីអង់តែន DAB+ ឌីជីថល ត្រូវបានតំឡើងពីលើកំពូល ដោយឧទ្ធម្ភាគចក្រ។

ប្រភពបន្តថា ក្នុងអំឡុងពេលនៃការសាងសង់ ប៉ម Eiffel បានវ៉ាដាច់វិមាន Washington ក្លាយជាសំណង់ដែលខ្ពស់ជាងគេបំផុតនៅក្នុងពិភពលោក ហើយវាបានកាន់តំណែងនេះអស់រយៈពេល ៤ទសវត្សរ៍ រហូតដល់អគារ Chrysler ក្នុងទីក្រុងញូវយ៉ក បានបញ្ចប់នៅឆ្នាំ ១៩២៩ ទើបអគារ Chrysler បានដណ្ដើមតំណែងខ្ពស់ជាងគេវិញម្ដង។

យ៉ាងណាមិញ នេះមិនមែនជាលើកទី១ទេ ដែលកម្ពស់ប៉ម Eiffel ប្រែប្រួលបែបនេះ ព្រោះពេលកន្លងមក នៅពេលដែលអង់តែនចាស់ត្រូវជំនួសដោយអង់តែនថ្មី វាតែងផ្លាស់ប្ដូរកម្ពស់ជានិច្ច៕

ប្រែសម្រួល៖ សន្យា

ចុចអាន៖ អ្នកវិទ្យាសាស្រ្តប្រាប់ពេលវេលានៃ ព្រឹត្តិការណ៍ធ្វើឲ្យជីវិតលើផែនដីត្រូវផុតពូជ ទាំងស្រុង