មេ​បញ្ជាការ​កំពូល​អាមេរិក​ប្រចាំ​អឺរ៉ុប ​ទទួល​ស្គាល់​ថា រដ្ឋបាល​លោក បៃដិន បរាជ័យ​ក្នុង​ការ​​រារាំង និងកំញើញលោក ពូទីន (មានវីដេអូ)

មេបញ្ជាការកងកម្លាំងអាមេរិកនៅអឺរ៉ុប កាលពីថ្ងៃពុធទី៣០ខែមីនា បានទទួលស្គាល់ថា ការលុកលុយរបស់លោក វ្ល៉ាឌីមៀរ ពូទីន លើអ៊ុយក្រែន បានបង្ហាញថា កិច្ចខិតខំប្រឹងប្រែងរបស់រដ្ឋបាលលោក បៃដិន ក្នុងការរារាំង និងកំញើញ មេដឹកនាំរុស្ស៊ី បានទទួលបរាជ័យ។

ក្នុងអំឡុងពេលមានការវាយលុក លោកប្រធានាធិបតី ចូ បៃដិន បានធ្វើការជាមួយសម្ព័ន្ធមិត្តដើម្បីបង្កើនការដាក់ទណ្ឌកម្មលើទីក្រុងមូស្គូ និងដាក់ពង្រាយកងទ័ព ដើម្បីពង្រឹងផ្នែកខាងកើតរបស់ ណាតូ។

កាលពីសប្តាហ៍មុន លោក បៃដិន បាននិយាយខ្លួនឯងថា វាមិនមែនជាផ្នែកនៃកិច្ចខិតខំប្រឹងប្រែងកំញើញនោះទេ ប៉ុន្តែពេលបង្ហាញខ្លួននៅចំពោះមុខសមាជិកសភា មេបញ្ជាការរបស់លោកប្រចាំទ្វីបអឺរ៉ុប គឺលោកឧត្តមសេនីយ៍ Tod Wolters បានផ្តល់ការវាយតម្លៃខុសគ្នាខណៈ តំណាងរាស្រ្តគណបក្សសាធារណរដ្ឋលោក Mike Gallagher ស៊ើបអង្កេតយុទ្ធសាស្ត្រនេះ។

លោក Gallagher សួរថា​​ “អ្នកជាមេបញ្ជាការប្រយុទ្ធ តើអ្នកជាផ្នែកមួយនៃកិច្ចខិតខំប្រឹងប្រែងអន្តរភ្នាក់ងារ ដែលមានបំណងរារាំងលោក Vladimir Putin ពីការវាយលុកនៅអ៊ុយក្រែនដែរឬទេ?”។

លោក Wolters ​ឆ្លើយ​ថា “នោះ​ជា​ការ​ត្រឹមត្រូវ។ រារាំង និងកំញើញ”។

លោក Gallagher បន្តថា “តើវាយុត្តិធម៌ទេ ក្នុងការនិយាយថា ការរារាំងបានបរាជ័យនៅប្រទេសអ៊ុយក្រែន?”។

ប្រមុខបញ្ជាការអឺរ៉ុបឆ្លើយថា “ទី១ ខ្ញុំចង់និយាយថា សាមគ្គីភាពរបស់ណាតូនៅតែមាន” មុនពេលត្រូវបានរំខានដោយលោក Gallagher ដែលជំរុញឲ្យផ្តល់ចម្លើយដោយផ្ទាល់។

លោក Wolters ឆ្លើយថា “ខ្ញុំមិនអាចប្រកែកជាមួយនឹងការសន្និដ្ឋានរបស់អ្នកបានទេ”។

ទោះបីជាយ៉ាងណាក៏ដោយ រដ្ឋបាលលោក បៃដិន ទទូចថា យុទ្ធសាស្ត្ររបស់ខ្លួនមិនបរាជ័យទេ ព្រោះទណ្ឌកម្មរបស់ខ្លួនមិនដែលត្រូវបានបង្កើតឡើងជាការរារាំងឡើយ៕

សូមទស្សនាវីដេអូ៖ 

ប្រែសម្រួល៖ Vann Vann

ប្រភព៖ Daily Mail

ចុចអាន៖ តៃវ៉ាន់ កំពុង សិក្សា យុទ្ធសាស្ត្រ សង្គ្រាម ដែល អ៊ុយក្រែន ប្រើ