រុស្ស៊ី គំរាមដើរចេញពីកិច្ចចរចាសន្តិភាព ក្រោយចោទថា អ៊ុយក្រែន វាយប្រហារ រោងចក្រប្រេង

វិមានក្រឹមឡាំង បានគំរាមដើរចេញពីការចរចាសន្តិភាព បន្ទាប់ពីចោទប្រកាន់ថា ឧទ្ធម្ភាគចក្រអ៊ុយក្រែន បានវាយប្រហាររោងចក្រប្រេងមួយនៅក្នុងប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលតំបន់លោក Vyacheslav Gladkov បាននិយាយថា ឧទ្ធម្ភាគចក្រយោធាពីរគ្រឿងរបស់អ៊ុយក្រែន បានហោះឆ្លងព្រំដែនរុស្ស៊ីក្នុងរយៈកម្ពស់ទាបទៅកាន់ទីក្រុង Belgorod ជាកន្លែងដែលពួកគេបាញ់គ្រាប់រ៉ុក្កែត S-8 ទៅលើឃ្លាំង Roseneft បណ្តាលឲ្យមានអគ្គិភ័យឆាបឆេះយ៉ាងសន្ធោសន្ធៅ។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា “ពិតណាស់ នេះមិនមែនជាអ្វីដែលអាចត្រូវបានគេយល់ថា ជាការបង្កើតលក្ខខណ្ឌសុខស្រួលសម្រាប់ការបន្តកិច្ចចរចានោះទេ”។

ទោះបីជាយ៉ាងណាក៏ដោយ ស្របពេលជាមួយគ្នានោះ ក៏មានការភ័យខ្លាចថា រុស្ស៊ីនឹងធ្វើការវាយប្រហារក្លែងក្លាយលើខ្លួន ដើម្បីជាលេសបង្កើនសង្គ្រាម ឬដើរចេញពីកិច្ចចរចាសន្តិភាពផងដែរ។

រដ្ឋមន្ត្រីការបរទេសអ៊ុយក្រែន លោក Dmytro Kuleba បាននិយាយថា លោកមិនអាចបញ្ជាក់ ឬបដិសេធទេថា អ៊ុយក្រែនបានវាយប្រហាររោងចក្រប្រេងមួយនៅក្នុងប្រទេសរុស្ស៊ី។

ឥឡូវនេះ មន្ត្រីសន្តិសុខកំពូលរបស់អ៊ុយក្រែនបានចេញមុខជាបន្ត ដោយបដិសេធថា កងកម្លាំងអ៊ុយក្រែន មិននៅពីក្រោយការវាយប្រហារនោះទេ។

ចំណែក លេខាធិការក្រុមប្រឹក្សាសន្តិសុខអ៊ុយក្រែនលោក Oleksiy Danilov បានប្រាប់ទូរទស្សន៍ជាតិថា “ពួកគេនិយាយថា យើងបានធ្វើរឿងនេះ ប៉ុន្តែយោងទៅតាមព័ត៌មានរបស់យើង នេះមិនមែនជាការពិតទេ”៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ក្តៅគគុក! យន្តហោះទម្លាក់គ្រាប់បែកនុយក្លេអ៊ែរអាមេរិក ហោះឆ្វែលកៀកព្រំដែនរុស្ស៊ី