ព័ត៌មានអន្ដរជាតិ

នេះមូលហេតុដែលប្រទេស ស្រីលង្កា ជួបវិបត្តិសេដ្ឋកិច្ច

បានផុស

១១ ខែ មុន

នៅ

ថ្ងៃអង្គារ ៥ មេសា ២០២២

ដោយ

កំហឹងប្រឆាំងនឹងការដោះស្រាយរបស់លោកប្រធានាធិបតីស្រីលង្កា Gotabaya Rajapaksa ចំពោះវិបត្តិសេដ្ឋកិច្ចកាន់តែស៊ីជម្រៅនៅក្នុងប្រទេសកោះដែលមានប្រជាជនចំនួន ២២ លាននាក់មួយនេះបានឈានដល់អំពើហិង្សា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកតវ៉ារាប់រយនាក់បានប៉ះទង្គិចជាមួយប៉ូលិសអស់រយៈពេលជាច្រើនថ្ងៃមកហើយ ។ កង្វះខាតរូបិយប័ណ្ណបរទេសយ៉ាងធ្ងន់ធ្ងរបានធ្វើឲ្យរដ្ឋាភិបាលរបស់លោក Rajapaksa មិនអាចបង់ប្រាក់សម្រាប់ការនាំចូលសំខាន់ៗ រួមទាំងប្រេងឥន្ធនៈដែលនាំឲ្យមានការកាត់ផ្តាច់ចរន្តអគ្គិសនីអស់រយៈពេលជាច្រើនម៉ោង ។

ទន្ទឹមនោះប្រជាជនស្រីលង្កាធម្មតាក៏កំពុងប្រឈមមុខនឹងការខ្វះខាត និងអតិផរណាកើនឡើងផងដែរ បន្ទាប់ពីប្រទេសនេះបានទម្លាក់តម្លៃរូបិយប័ណ្ណរបស់ខ្លួនយ៉ាងខ្លាំងកាលពីខែមុន មុនពេលកិច្ចពិភាក្សាជាមួយមូលនិធិរូបិយវត្ថុអន្តរជាតិ (IMF) សម្រាប់កម្មវិធីកម្ចី ។

ស្របពេលជាមួយគ្នានេះ ក្រុមអ្នករិះគន់និយាយថា ឫសគល់នៃវិបត្តិដែលអាក្រក់បំផុតក្នុងរយៈពេលជាច្រើនទសវត្សរ៍មកនេះគឺស្ថិតនៅក្នុងការគ្រប់គ្រងសេដ្ឋកិច្ចមិនត្រឹមត្រូវដោយរដ្ឋាភិបាលបន្តបន្ទាប់គ្នា ដែលបានបង្កើត និងទ្រទ្រង់ឱនភាពទ្វេដងដែលជាកង្វះខាតថវិការួមជាមួយនឹងឱនភាពគណនីចរន្ត ។

បន្ថែមពីនេះ ឯកសារការងាររបស់ធនាគារអភិវឌ្ឍន៍អាស៊ី (ADB) ឆ្នាំ ២០១៩ បាននិយាយថា “ស្រីលង្កាគឺជាប្រទេសដែលមានឱនភាពសេដ្ឋកិច្ចទ្វេដង ។ ឱនភាពទ្វេដងជាសញ្ញាថា ការចំណាយជាតិរបស់ប្រទេសមួយគឺលើសពីចំណូលជាតិរបស់ខ្លួន ហើយការផលិតទំនិញ និងសេវាកម្មដែលអាចដោះដូរបានរបស់ខ្លួនគឺមិនគ្រប់គ្រាន់ ។

ប៉ុន្តែវិបត្តិបច្ចុប្បន្នត្រូវបានពន្លឿនដោយការកាត់ពន្ធយ៉ាងស៊ីជម្រៅដែលបានសន្យាដោយលោក Rajapaksa ក្នុងអំឡុងពេលយុទ្ធនាការបោះឆ្នោតឆ្នាំ ២០១៩ ដែលត្រូវបានអនុម័តជាច្រើនខែ មុនពេលរោគរាតត្បាតកូវីដ ១៩ ដែលបានបំផ្លាញផ្នែកខ្លះនៃសេដ្ឋកិច្ចរបស់ប្រទេសស្រីលង្កា ។

ជាមួយនឹងឧស្សាហកម្មទេសចរណ៍ដែលរកកម្រៃបានរបស់ប្រទេស និងការផ្ទេរប្រាក់របស់កម្មករបរទេសបានថយចុះ ដោយសារជំងឺរាតត្បាត ទីភ្នាក់ងារវាយតម្លៃឥណទានបានកែប្រែប្រព័ន្ធដើម្បីបន្ទាបចំណាត់ថ្នាក់ប្រទេសស្រីលង្កា ហើយបានបិទវាក្នុងទីផ្សារមូលធនអន្តរជាតិប្រកបដោយប្រសិទ្ធភាព ។

ម្យ៉ាងវិញទៀត កម្មវិធីគ្រប់គ្រងបំណុលរបស់ប្រទេសស្រីលង្កាដែលពឹងផ្អែកលើការចូលទៅកាន់ទីផ្សារទាំងនោះបានធ្លាក់ចុះ ហើយទុនបម្រុងរូបិយប័ណ្ណបរទេសធ្លាក់ចុះជិត ៧០ ភាគរយក្នុងរយៈពេល ២ ឆ្នាំមកនេះ ។

ចំណុចសំខាន់មួយទៀតនោះ គឺការសម្រេចចិត្តរបស់រដ្ឋាភិបាលលោក Rajapaksa ក្នុងការហាមឃាត់ការប្រើប្រាស់ជីគីមីទាំងអស់នៅឆ្នាំ ២០២១ ដោយធ្វើឲ្យប៉ះពាល់ដល់វិស័យកសិកម្មរបស់ប្រទេស និងបង្កឲ្យមានការធ្លាក់ចុះនៃដំណាំស្រូវដ៏សំខាន់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Indian Express

ចុចអាន ៖ រដ្ឋមន្ត្រី ស្រីលង្កា មួយចំនួនបានលាឈប់ ព្រោះវិបត្តិសេដ្ឋកិច្ចធ្ងន់ធ្ងរពេក