ព័ត៌មានអន្ដរជាតិ

រដ្ឋមន្ត្រីស្រីលង្កាមួយចំនួនបានលាឈប់ ព្រោះវិបត្តិសេដ្ឋកិច្ចធ្ងន់ធ្ងរពេក

បានផុស

១០ ខែ មុន

នៅ

ថ្ងៃចន្ទ ៤ មេសា ២០២២

ដោយ

សមាជិកគណៈរដ្ឋមន្ត្រីប្រទេសស្រីលង្កាមួយចំនួន មានទាំងកូនប្រុសរបស់នាយករដ្ឋមន្ត្រីផងបានលាលែងពីតំណែង ប៉ុន្មានថ្ងៃបន្ទាប់ពីប្រធានាធិបតីលោក Gotabaya Rajapaksa បានប្រកាសដាក់ប្រទេសក្នុងគ្រាអាសន្ន ក្រោយមានការតវ៉ាជុំវិញវិបត្តិសេដ្ឋកិច្ចដ៏ធ្ងន់ធ្ងរមិនធ្លាប់មាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងអប់រំ លោក Dinesh Gunawardena បានប្រាប់សារព័ត៌មានក្នុងស្រុកថា ៖«យើងខ្ញុំបានដាក់លិខិតលាឈប់ទៅលោកនាយករដ្ឋមន្ត្រីរួចហើយ។ លោកប្រធានាធិបតី និងលោកនាយករដ្ឋមន្ត្រីនឹងពិភាក្សា ហើយនឹងធ្វើការសម្រេចចិត្តពាក់ព័ន្ធ»។

រហូតដល់ពេលនេះនៅមិនទាន់ច្បាស់ទេថាតើគណៈរដ្ឋមន្ត្រីទាំងមូល ឬមានតែរដ្ឋមន្ត្រីមួយចំនួនដែលលាឈប់។

រដ្ឋមន្ត្រីក្រសួងយុវជន និងកីឡា លោក Namal Rajapaksa ដែលជាក្មួយប្រុសរបស់លោកប្រធានាធិបតី Gotabaya និងជាកូនប្រុសរបស់លោកនាយករដ្ឋមន្ត្រី Mahinda Rajapaksa បាននិយាយតាម Twitter នៅថ្ងៃចន្ទនេះថា លោកបានលាឈប់ដោយមានប្រសិទ្ធភាពជាបន្ទាន់ក្នុងក្តីសង្ឃឹមដែលវានឹងជួយបង្កើតស្ថិរភាពសម្រាប់ប្រជាជន និងរដ្ឋាភិបាល។

កាលពីសប្តាហ៍មុន ស្រីលង្កាបានបិទភ្លើងនៅតាមដងផ្លូវនានាដើម្បីសន្សំអគ្គីសនីទូទាំងប្រទេស។ ប្រទេសកោះដែលមានប្រជាជន២២លាននាក់កំពុងមានបញ្ហាជាមួយនឹងការដាច់ចរន្តអគ្គីសនីរហូតដល់ទៅ១៣ម៉ោងក្នុងមួយថ្ងៃ ដោយសាររដ្ឋាភិបាលមិនមានប្រាក់គ្រប់គ្រាន់ដើម្បីនាំចូលឥន្ធនៈបរទេស។

រដ្ឋមន្ត្រីក្រសួងថាមពល លោកស្រី Pavithra Wanniarachchi បានប្រាប់អ្នកកាសែតថា ៖«យើងបានណែនាំដល់មន្ត្រីរួចហើយឲ្យបិទភ្លើងតាមផ្លូវទូទាំងប្រទេសដើម្បីជួយសន្សំថាមពល»៕

ប្រែសម្រួល៖ វីរបុត្រ
ប្រភព៖ reuters

Related Topics:ប្រទេសស្រីលង្កា