ប្រធាន ICRC៖ តំបន់ហ្គាហ្សា អាក្រក់ជាង «នរកនៅលើដី» ទៅទៀត

ក្នុងបទសម្ភាសន៍ផ្តាច់មុខជាមួយ BBC ដែលចេញផ្សាយនៅថ្ងៃពុធទី៤ខែមិថុនាឆ្នាំ២០២៥ ប្រធានគណៈកម្មាធិការកាកបាទក្រហមអន្តរជាតិ (ICRC) លោកស្រី Mirjana Spoljarić និយាយថា ពេលនេះ តំបន់ហ្គាហ្សា អាក្រក់ជាង «នរកនៅលើដី» ទៅទៀត។

លោកស្រីនិយាយថា មនុស្សជាតិកំពុងបរាជ័យ! ប្រទេសទាំងឡាយមិនព្រមធ្វើឲ្យអស់ពីសមត្ថភាពដើម្បីពន្លត់ភ្លើងសង្រ្គាម បញ្ចប់ការឈឺចាប់របស់ពលរដ្ឋប៉ាឡេស្ទីន និងដោះលែងចំណាប់ខ្មាំងអ៊ីស្រាអែលនោះទេ។ សេចក្តី​ថ្លៃថ្នូរ​របស់​មនុស្ស ត្រូវបានគេយកចេញពីពលរដ្ឋប៉ាឡេស្ទីនអស់ហើយ រីឯច្បាប់​មនុស្សធម៌​អន្តរជាតិ ក៏គេ​កំពុង​បិទបាំង​ដែរ។ ​អ្វី​ដែល​កំពុង​កើត​ឡើង​នៅ​ហ្គាហ្សា ​គឺ​លើស​ពី​ស្តង់ដារ​ច្បាប់ សីលធម៌ និង​មនុស្សធម៌​ដែល​អាច​ទទួល​យក​បាន។

ការអត្ថាធិប្បាយរបស់លោកស្រីកើតឡើង បន្ទាប់ពីអ៊ីស្រាអែលបន្តបាញ់សម្លាប់ពលរដ្ឋប៉ាឡេស្ទីន ជាពិសេសការវាយប្រហារសម្លាប់មនុស្សដែលរង់ចាំយកជំនួយក្នុងតំបន់ហ្គាហ្សា ជាបន្តបន្ទាប់។

កាលពីថ្ងៃអង្គារទី៣ខែមិថុនា ក្រុមហាម៉ាសអះអាងថា កងទ័ពអ៊ីស្រាអែល បានបើកការបាញ់ប្រហារថ្មីទៀតលើពលរដ្ឋប៉ាឡេស្ទីន ដែលកំពុងរង់ចាំយកជំនួយនៅតំបន់ហ្គាហ្សា ដោយបណ្តាលឲ្យមានមនុស្សស្លាប់២៧នាក់ និង៩០នាក់ទៀតរងរបួស។

នោះគឺជាសោកនាដកម្មថ្មីទៀតដែលកើតលើពលរដ្ឋប៉ាឡេស្ទីនខណៈរង់ចាំយកជំនួយ បន្ទាប់ពីកាល​ពី​ថ្ងៃ​អាទិត្យ​ ក្រសួងសុខាភិបាលដែល​គ្រប់គ្រង​ដោយ​ក្រុមហាម៉ាស ក៏រាយការណ៍ដែរ មនុស្ស៣១​នាក់ ​ត្រូវបានសម្លាប់និងជាង១៧០​នាក់ទៀត រងរបួសនៅជិតកន្លែងចែកចាយ​ស្បៀង​ក្នុង​ទីក្រុង​ Rafah នេះ។

សូមជម្រាបជាថ្មី យុទ្ធនាការរបស់អ៊ីស្រាអែលនៅហ្គាហ្សា គឺជាការសងសឹក បន្ទាប់ពីក្រុមសកម្មប្រយុទ្ធឥស្លាមហាម៉ាស បើកការវាយប្រហារអ៊ីស្រាអែលកាលពីថ្ងៃទី៧ខែតុលាឆ្នាំ២០២៣ សម្លាប់មនុស្សប្រហែល ១ ២០០នាក់។ 

ក្នុងប្រតិបត្តិការសងសឹកនោះ អ៊ីស្រាអែល បានសម្លាប់មនុស្សជាង ៥៣ ០០០នាក់ ភាគច្រើនជាជនស៊ីវិល, បំផ្លិចបំផ្លាញតំបន់ហ្គាហ្សា និងបង្ខំមនុស្សជិតពីរលាននាក់ រត់ចោលផ្ទះសម្បែង៕

អត្ថបទ៖ សុខ សុវណ្ណ

ចុចអាន៖ ទាហាន​អ៊ីស្រាអែល​ជាង ១​ម៉ឺន​នាក់ ស្លាប់​និង​របួស​នៅ​ក្នុង​តំបន់​ហ្គាហ្សា