អ៊ុយក្រែន ទទួលស្គាល់ថា ខ្លួនជាអ្នកបំផ្ទុះស្ពាន គ្រីមៀ

អ៊ុយក្រែន បានទទួលស្គាល់ថា ការផ្ទុះស្ពានគ្រីមៀ កាលពីថ្ងៃអង្គារ គឺជាស្នាដៃរបស់ខ្លួន ប៉ុន្តែភាគីរុស្ស៊ីឯណោះ មិនទាន់ចេញមុខនិយាយអ្វីទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃពុធទី៤ខែមិថុនាឆ្នាំ២០២៥ ការទទួលស្គាល់នេះគឺចេញពី សេវាសន្តិសុខអ៊ុយក្រែន (SBU) ដែលនិយាយថា ខ្លួនបានបង្កៃគ្រាប់បែកមានកម្លាំងផ្ទុះស្មើ TNT ១ ១០០គីឡូក្រាម បង្កការខូចខាតស្ពានយ៉ាងដំណំ។

ទោះបីជាយ៉ាងណាក៏ដោយ មិនមានសេចក្តីរាយការណ៍អំពីមនុស្សស្លាប់និងរបួសទេក្នុងការបំផ្ទុះនោះ ប៉ុន្តែរុស្ស៊ី បានបិទស្ពាននេះភ្លាមៗក្រោយការវាយប្រហារ។

ការវាយប្រហារនេះកើតឡើងត្រឹម៤៨ម៉ោងប៉ុណ្ណោះ បន្ទាប់ពីអ៊ុយក្រែន បើកប្រតិបត្តិការ «សំណាញ់ពីងពាង» វាយប្រហារលើមូលដ្ឋានទ័ពរុស្ស៊ីក្នុងតំបន់ជាច្រើន កម្ទេចយន្តហោះចម្បាំងអស់ជាង៤០គ្រឿង។

សូមជម្រាបថា ស្ពានគ្រីមៀឬគេស្គាល់ថាជា «ស្ពាន Kerch» ត្រូវបានសាងសង់ឡើងដោយប្រទេសរុស្ស៊ី បន្ទាប់ពីការលុកលុយនិងកាត់បញ្ចូលឧបទ្វីបគ្រីមៀជាឧបសម្ព័ន្ធ ក្នុងឆ្នាំ២០១៤។ នៅអ៊ុយក្រែន ស្ពាននេះគឺជានិមិត្តសញ្ញានៃភាពស្អប់ខ្ពើមចំពោះការកាន់កាប់របស់រុស្ស៊ី។

យ៉ាងណាទីក្រុងមូស្គូតែងការពារស្ពាននេះយ៉ាងប្រុងប្រយ័ត្នជាទីបំផុត ដូច្នេះហើយទើបវាបានក្លាយទៅជារឿងមិនធម្មតា នៅពេលមានការវាយប្រហារណាមួយកើតឡើងនៅទីនោះ មិនថាដោយដ្រូនក្រោមទឹកឬគ្រាប់បែកនោះទេ៕

អត្ថបទ៖ សុខ សុវណ្ណ

ចុចអាន៖ អង់គ្លេសប្រកាសដោយចំហ បើកដៃឲ្យអ៊ុយក្រែន ប្រើអាវុធខ្លួន បាញ់ប្រហារឧបទ្វីប គ្រីមៀ