ប្រទេសណាតូមួយនេះផ្ដល់អាវុធទៅ អ៊ុយក្រែន លំដាប់ទី ២ បន្ទាប់ពីអាមេរិក

បើតាមប្រធានអធិការបតីនៃនាយករដ្ឋមន្ត្រីប៉ូឡូញលោក Michal Dworczyk បាននិយាយកាលពីថ្ងៃចន្ទថា ប៉ូឡូញដែលជាសមាជិករបស់អង្គការណាតូ ជាប់ចំណាត់ថ្នាក់លេខ ២ បន្ទាប់ពីសហរដ្ឋអាមេរិកក្នុងបរិមាណសព្វាវុធដែលបានផ្គត់ផ្គង់ដល់អ៊ុយក្រែន ចំពេលមានប្រតិបត្តិការយោធារបស់រុស្ស៊ី ។

លោក Dworczyk បានប្រាប់វិទ្យុប៉ូឡូញ RMF FM ថា “ប្រាកដណាស់ យើងមិនបង្ហាញព័ត៌មានលម្អិតនៃការផ្គត់ផ្គង់នោះទេ ប៉ុន្តែច្បាស់ណាស់ថា ប៉ូឡូញ គឺជាប្រទេសដែលបញ្ជូនអាវុធច្រើនបំផុតទៅកាន់អ៊ុយក្រែន បន្ទាប់ពីសហរដ្ឋអាមេរិក ហើយអាវុធប្រភេទខ្លះ ប៉ូឡូញកំពុងនាំមុខអាមេរិកទៀតផង ។

កាលពីថ្ងៃសៅរ៍នាយករដ្ឋមន្ត្រីប៉ូឡូញលោក Mateusz Morawiecki បានអះអាងថា ទីក្រុង Warsaw កំពុងផ្គត់ផ្គង់សព្វាវុធជាច្រើនប្រភេទដល់ទីក្រុងកៀវ រួមទាំងឧបករណ៍ប្រឆាំងយន្តហោះ និងប្រឆាំងរថពាសដែក ព្រមទាំងអាវុធធុនធ្ងន់ និងគ្រាប់រំសេវផងដែរ ដើម្បីអាចឲ្យអ៊ុយក្រែនអាចក្រោកឈរប្រឆាំងនឹងរុស្ស៊ីបាន ។

ទន្ទឹមនោះលោក Morawiecki ​បាន​និយាយ​ថា ជំនួយ​យោធា​របស់ប្រទេស​ប៉ូឡូញ​ទៅកាន់​អ៊ុយក្រែន​ឥឡូវនេះ​មានតម្លៃ​លើស​ពី ១.៦ ពាន់​លាន​ដុល្លារឯណោះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ប្រទេសអាស៊ីចំនួន ៤ ទិញប្រេងច្រើនបំផុតពី រុស្ស៊ី