អ៊ុយក្រែន សុំឲ្យ ចិន ជួយប្រាប់ រុស្ស៊ី ផ្ដួចផ្ដើមបទឈប់បាញ់នៅប្រទេសខ្លួន

រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយថា ទីក្រុងកៀវកំពុងសិក្សាពីលទ្ធភាពសុំការទទួលបានការធានាសន្តិសុខពីសមាជិកក្រុមប្រឹក្សាសន្តិសុខអង្គការសហប្រជាជាតិ (UNSC) រួមទាំងប្រទេសចិនផងដែរ ។

លោក Kuleba បាននិយាយនៅក្នុងបទសម្ភាសន៍ជាមួយទីភ្នាក់ងារសារព័ត៌មានរដ្ឋរបស់ចិន Xinhua ថា អនុស្សរណៈនៃការធានាសន្តិសុខនៅទីក្រុង Budapest បានបរាជ័យក្នុងការធានាសន្តិសុខពិតប្រាកដដល់អ៊ុយក្រែន ។ ទន្ទឹមនោះលោក Kuleba បានបញ្ជាក់ថា សន្តិសុខនៅអឺរ៉ុបនឹងប្រសើរឡើង នៅពេលដែលរុស្ស៊ីដកទ័ពចេញពីអ៊ុយក្រែន ។

រដ្ឋមន្ត្រីការបរទេសអ៊ុយក្រែនរូបនេះបានប្រាប់ Xinhua ថា ឥឡូវនេះទីក្រុងកៀវកំពុងស្វែងរកលទ្ធភាពនៃការទទួលបានការធានាសន្តិសុខពីសមាជិកអចិន្ត្រៃយ៍របស់ UNSC និងប្រទេសមហាអំណាចផ្សេងទៀត រួមទាំងប្រទេសចិនផងដែរ ហើយកំពុងផ្តល់ជូនទីក្រុងប៉េកាំងឲ្យក្លាយជាអ្នកធានាសន្តិសុខរបស់ប្រទេសអ៊ុយក្រែន ហើយវាជាសញ្ញានៃការគោរព និងការជឿទុកចិត្តរបស់យើងចំពោះប្រទេសចិន ។

លោកបានបន្ថែមថា ទីក្រុងកៀវសង្ឃឹមថា ទីក្រុងប៉េកាំងនឹងអំពាវនាវឲ្យរុស្ស៊ីផ្តួចផ្តើមបទឈប់បាញ់នៅអ៊ុយក្រែន ដើម្បីចៀសវាងស្ថានការណ៍កាន់តែខ្លាំងឡើង និងទប់ស្កាត់គ្រោះមហន្តរាយមនុស្សធម៌ជាដើម ។

ជាចុងក្រោយលោក Kuleba ក៏បានថ្លែងអំណរគុណដល់ប្រទេសចិនដែលបានបញ្ចេញសំឡេងគាំទ្រចំពោះអធិបតេយ្យភាពអ៊ុយក្រែន និងសម្រាប់ការត្រៀមខ្លួនក្នុងការគាំទ្រកិច្ចខិតខំប្រឹងប្រែងការទូតក្នុងការដោះស្រាយវិបត្តិអ៊ុយក្រែន ហើយរដ្ឋមន្ត្រី​ក្រសួង​ការ​បរទេសរូបនេះ​ក៏​បាន​ស្នើ​ឲ្យ​ប្រទេស​ចិន​បន្ត​​ជួយវិបត្តិ​មនុស្ស​ធម៌​របស់​ខ្លួនថែម​ទៀត​ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី ប្រើត្រីដូហ្វីនជួយការពារមូលដ្ឋានទ័ពជើងទឹកពីការវាយប្រហាររបស់ អ៊ុយក្រែន នៅសមុទ្រខ្មៅ