មេដឹកនាំឯករាជ្យដំបូងគេរបស់ បេឡារុស ដែលចុះហត្ថលេខារំលាយសូវៀត ទទួលមរណភាពហើយ

លោក Stanislav Shushkevich ដែលជាមេដឹកនាំឯករាជ្យដំបូងគេរបស់ប្រទេសបេឡារុស បន្ទាប់ពីការដួលរលំនៃសហភាពសូវៀតបានទទួលមរណភាពនៅវ័យ ៨៧ ឆ្នាំ បន្ទាប់ពីចូលសម្រាកព្យាបាលនៅមន្ទីរពេទ្យ ដោយសារជំងឺកូវីដ ១៩ ។

លោក Shushkevich គឺជាមេដឹកនាំម្នាក់ក្នុងចំណោមមេដឹកនាំទាំង ៣ រួមទាំងលោក Boris Yeltsin របស់រុស្ស៊ី និងលោក Leonid Kravchuk របស់អ៊ុយក្រែន ដែលក្នុងឆ្នាំ ១៩៩១ បានចុះហត្ថលេខាលើកិច្ចព្រមព្រៀងមួយក្នុងការរំលាយសហភាពសូវៀត និងក៏បានបង្កើតរដ្ឋឯករាជ្យ Commonwealth ផងដែរ ។

លោក Shushkevich ដែលជាអ្នករូបវិទ្យានុយក្លេអ៊ែរ មុនពេលចូលប្រឡូកក្នុងឆាកនយោបាយ បានដឹកនាំប្រទេសបេឡារុសឯករាជ្យតិចជាង ៣ ឆ្នាំ មុនពេលគាត់ត្រូវបានផ្តួលរំលំដោយលោក Alexander Lukashenko ដែលជាមេដឹកនាំបច្ចុប្បន្ន ។

ទន្ទឹមនោះលោកក៏ត្រូវបានអាមេរិកចាត់ទុកថាជាដៃគូដ៏ល្អផងដែរ ជាពិសេសចំពោះការប្តេជ្ញាចិត្តរបស់គាត់ក្នុងការបំបាត់បេឡារុសពីអាវុធនុយក្លេអ៊ែរនាសម័យសូវៀតដែលនៅតែមាននៅលើដីរបស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ រុស្ស៊ី ប្រាប់មូលហេតុមួយទៀតនៅពីក្រោយសង្គ្រាមលុកលុយលើ អ៊ុយក្រែន