ក្រុមប្រឹក្សាអាមេរិកណែនាំឲ្យចាក់វ៉ាក់សាំងកូវីដរបស់ក្រុមហ៊ុន Moderna

ក្រុមប្រឹក្សាយោបល់ខាងក្រៅនៃរដ្ឋបាលចំណីអាហារ និងឪសថអាមេរិក (FDA) កាលពីថ្ងៃព្រហស្បតិ៍បានអនុម័តលើការចាក់វ៉ាក់សាំងកូវីដ ១៩ របស់ក្រុមហ៊ុន Moderna សម្រាប់ការប្រើប្រាស់ជាបន្ទាន់ ដែលជាជំហានមួយត្រួសត្រាយផ្លូវសម្រាប់ការអនុញ្ញាតនៅទូទាំងប្រទេស ។

គណៈកម្មាធិការបានបោះឆ្នោតគាំទ្រ ២០-០ លើការប្រើប្រាស់វ៉ាក់សាំងនេះដោយនិយាយថា អត្ថប្រយោជន៍របស់វាមានច្រើនជាងហានិភ័យដែលអាចកើតមានចំពោះមនុស្សដែលមានអាយុចាប់ពី ១៨ ឆ្នាំឡើងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចចិត្តនេះកើតឡើងមួយសប្តាហ៍ បន្ទាប់ពីក្រុមមួយនេះបានគាំទ្រវ៉ាក់សាំងកូវីដរបស់ក្រុមហ៊ុនអាមេរិក Pfizer និងក្រុមហ៊ុនដៃគូ BioNTech របស់អាល្លឺម៉ង់ដែលនាំឲ្យមានការអនុញ្ញាតិឲ្យប្រើប្រាស់ជាបន្ទាន់ដោយ FDA ។

FDA ត្រូវបានគេរំពឹងថានឹងផ្តល់ការអនុញ្ញាតឲ្យបាននៅថ្ងៃសុក្រនេះដែលផ្តល់នូវក្តីសង្ឃឹមមួយផ្សេងទៀតនៅក្នុងប្រទេសដែលបានបាត់បង់ជីវិតមនុស្សជាង ៣១០,០០០ នាក់ដោយសារជំងឺកូវីដ ១៩ ខណៈមានអ្នកឆ្លងជាង ១៧.១ លាននាក់ ។

លោកវេជ្ជបណ្ឌិត James Hildreth នាយកប្រតិបត្តិនៃមហាវិទ្យាល័យវេជ្ជសាស្ត្រ Meharry ដែលបានបោះឆ្នោតណែនាំឲ្យចាក់វ៉ាក់សាំងនេះសម្រាប់ការប្រើប្រាស់ជាបន្ទាន់បានកោតសរសើរចំពោះកិច្ចខិតខំប្រឹងប្រែងដើម្បីបង្កើតវ៉ាក់សាំងនេះនៅក្នុងកិច្ចប្រជុំក្រុមប្រឹក្សាកាលពីថ្ងៃព្រហស្បតិ៍ ។

លោក Hildreth បាននិយាយថា “ការចាក់វ៉ាក់សាំងចំនួន ២ ក្រុមហ៊ុនដែលអាចរកបាននៅក្នុងខែធ្នូគឺជាសមិទ្ធិផលគួរឲ្យកត់សម្គាល់មួយ” ។

វ៉ាក់សាំងរបស់ក្រុមហ៊ុន Moderna មិនតម្រូវឲ្យស្តុកទុកក្នុងទូរទឹកកកពិសេសសម្រាប់ការដឹកជញ្ជូនដូចវ៉ាក់សាំង Pfizer-BioNTech នោះទេដែលត្រូវរក្សាទុកនៅសីតុណ្ហភាព -៧០ អង្សាសេ និងធ្វើឲ្យកាន់តែលំបាកក្នុងការស្តុកទុកនៅតំបន់ជនបទដែលមានប្រាក់ចំណូលទាប ។

គួរបញ្ជាក់ថា វ៉ាក់សាំងទាំងពីរមានប្រសិទ្ធភាពប្រហែល ៩៥ ភាគរយក្នុងការការពារជំងឺកូវីដ ១៩ ក្នុងការសាកល្បងព្យាបាលដោយគ្មានបញ្ហាសុវត្ថិភាពធ្ងន់ធ្ងរឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera