ស្រីលង្កា គ្រោងលក់ក្រុមហ៊ុនអាកាសចរណ៍ជាតិ យកលុយដោះស្រាយវិបត្តិ ក្នុងប្រទេស

រដ្ឋាភិបាលថ្មីរបស់ប្រទេសស្រីលង្កាគ្រោងនឹងលក់ក្រុមហ៊ុនអាកាសចរណ៍ជាតិ Sri Lankan Airlines របស់ខ្លួនដើម្បីទប់ស្កាត់ការខាតបង់ ក៏ដូចជាកិច្ចខិតខំប្រឹងប្រែងដើម្បីធ្វើឲ្យមានស្ថិរភាពហិរញ្ញវត្ថុរបស់ប្រទេស ។

លោកនាយករដ្ឋមន្ត្រី Ranil Wickremesinghe បាននិយាយនៅក្នុងសុន្ទរកថាតាមទូរទស្សន៍ទៅកាន់ប្រទេសជាតិកាលពីថ្ងៃពុធថា រដ្ឋបាលថ្មីគ្រោងនឹងធ្វើឯកជនភាវូបនីយកម្មក្រុមហ៊ុនអាកាសចរណ៍ស្រីលង្កា បន្ទាប់ពីក្រុមហ៊ុនដឹកជញ្ជូនមួយនេះបានខាតបង់ប្រាក់ ៤៥ ពាន់លានរូពី (១២៤ លានដុល្លារ) គិតត្រឹមខែមីនា ឆ្នាំ ២០២១ ពោលប៉ុន្មានថ្ងៃប៉ុណ្ណោះ មុនពេលប្រទេសជាតិត្រូវសងបំណុលបរទេសជាផ្លូវការ ។

ក្នុងឆ្នាំ ២០១០ រដ្ឋាភិបាលនៅទីក្រុង Colombo បានទិញភាគហ៊ុនក្នុងក្រុមហ៊ុនអាកាសចរណ៍ស្រីលង្កាពីក្រុមហ៊ុន Emirates របស់ឌូបៃ ។ ក្រុមហ៊ុនអាកាសចរណ៍ជាតិដែលមានយន្តហោះធុន Airbus ចំនួន ២៥ គ្រឿងហោះហើរទៅកាន់គោលដៅនានាក្នុងទ្វីបអឺរ៉ុប មជ្ឈិមបូព៌ា ក៏ដូចជាអាស៊ីខាងត្បូង និងអាស៊ីអាគ្នេយ៍ មានបណ្ដាញហោះហើរគ្របដណ្ដប់លើប្រទេសជាង ៦០ មុនរោគរាតត្បាតកូវីដ ១៩ ។

ទន្ទឹមនោះក្រុមហ៊ុនអាកាសចរណ៍ Sri Lankan Airlines ដែលបានចូលរួមជាមួយសម្ព័ន្ធក្រុមហ៊ុន Oneworld និងបានក្លាយជាដៃគូបន្ទាប់បន្សំរបស់ក្រុមហ៊ុន Qantas ក្នុងឆ្នាំ ២០១៤ ទើបតែបានបង្កើនជើងហោះហើរទៅកាន់ទីក្រុង Sydney និង Melbourne របស់អូស្ត្រាលី នាពេលថ្មីៗនេះប៉ុណ្ណោះ ខណៈដែលក្រុមហ៊ុនអាកាសចរណ៍មួយនេះបានកសាងបណ្តាញហោះហើរឡើងវិញ ក្រោយកូវីដក្នុងប្រទេសបង្ហាញសញ្ញាធូរស្រាល ៕

ប្រែសម្រួលដោយ ៖ ជីវ័ន្ត

ប្រភព ៖ ET