នូវែលសេឡង់ បញ្ជូនទាហានទៅអង់គ្លេស ដើម្បីបង្វឹកកងទ័ព អ៊ុយក្រែន

នាយករដ្ឋមន្ត្រីនូវែលសេឡង់ លោកស្រី Jacinda Ardern បាននិយាយថា ប្រទេសរបស់លោកស្រីនឹងដាក់ពង្រាយកងកម្លាំងការពារជាតិចំនួន ៣០ នាក់បន្ថែមទៀតទៅកាន់ចក្រភពអង់គ្លេស ដើម្បីជួយបណ្តុះបណ្តាលសមភាគីអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Ardern លើកឡើងថា ទាហានទាំងនោះ នឹងជួយបណ្តុះបណ្តាលកងកម្លាំងប្រដាប់អាវុធអ៊ុយក្រែន ពីរបៀបប្រើប្រាស់កាំភ្លើងធុនស្រាល L119 (១០៥មិល្លីម៉ែត្រ)។

លោកស្រីនិយាយថា “យើងសូមបញ្ជាក់ច្បាស់ៗថា ពេញមួយការវាយលុករបស់រុស្ស៊ីលើអ៊ុយក្រែន, ការវាយប្រហារលើជីវិតជនស្លូតត្រង់ និងអធិបតេយ្យភាពរបស់ប្រទេសមួយផ្សេងទៀតគឺជារឿងខុសឆ្គង ហើយការឆ្លើយតបរបស់យើង មិនមែនត្រឹមតែថ្កោលទោសរុស្ស៊ីប៉ុណ្ណោះទេ ប៉ុន្តែថែមទាំងគាំទ្រជាក់ស្តែងដល់អ៊ុយក្រែនផងដែរ”។

យោងតាមលោកស្រីនាយក​រដ្ឋមន្ត្រី​, ទាហានទាំងនោះ ​នឹង​ត្រូវ​ឈរជើង​ក្នុង​ចក្រភព​អង់គ្លេស​រហូត​ដល់​ចុង​ខែ​កក្កដា ហើយនឹងបង្វឹកកងទ័ព​អ៊ុយក្រែន​ចំនួន ២៣០ នាក់​។

លោកស្រីអះអាងថា “ការគាំទ្រថ្មីនេះ គឺបន្ថែមពីលើជំនួយដ៏ទូលំទូលាយ ដែលយើងបានផ្តល់រួចទៅហើយដល់អ៊ុយក្រែន ដោយរួមមានផ្នែកយោធា មនុស្សធម៌ ផ្លូវច្បាប់ និងទិដ្ឋភាពផ្សេងទៀតនៃជម្លោះ។ យើងនឹងបន្តតាមដានស្ថានភាព ហើយនឹងធ្វើការរួមគ្នាជាមួយដៃគូរបស់យើង ដើម្បីធានាថា យើងបន្តធ្វើការរួមចំណែកប្រកបដោយអត្ថន័យ និងមានប្រសិទ្ធភាព”៕

ប្រែសម្រួល៖ Vann Vann

ប្រភព៖ SKY

ចុចអាន៖ អាមេរិក គ្រោងបញ្ជូនកងកម្លាំងពិសេសទៅកាន់ទីក្រុង កៀវ