អាមេរិក​ មិន​គាំទ្រ​ឯករាជ្យភាព​តៃវ៉ាន់​ទេ ប៉ុន្តែ​នឹង​បន្ត​ពង្រីក​ទំនាក់ទំនង​ជាមួយទីក្រុង ​តៃប៉ិ (មានវីដេអូ)

រដ្ឋមន្ត្រីការបរទេសអាមេរិក លោក Antony Blinken បាននិយាយកាលពីថ្ងៃព្រហស្បតិ៍ទី២៦ខែឧសភាថា ទីក្រុងវ៉ាស៊ីនតោន មិនគាំទ្រឯករាជ្យភាពរបស់តៃវ៉ាន់ទេ ប៉ុន្តែនឹងបន្តពង្រឹងទំនាក់ទំនងជាមួយកោះនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Blinken និយាយថា “យើងសូមប្រឆាំងនឹងសកម្មភាពឯកតោភាគី ចំពោះស្ថានភាពបច្ចុប្បន្នពីភាគីណាមួយ។ យើងមិនគាំទ្រឯករាជ្យភាពរបស់តៃវ៉ាន់ទេ ហើយយើងរំពឹងថា ភាពខ្វែងគំនិតគ្នាឆ្លងកាត់ច្រកសមុទ្រ នឹងត្រូវបានដោះស្រាយដោយមធ្យោបាយសន្តិវិធី។ យើងនឹងបន្តរក្សាការប្តេជ្ញាចិត្តរបស់យើង ក្រោមច្បាប់ទំនាក់ទំនងតៃវ៉ាន់ ដើម្បីជួយតៃវ៉ាន់ក្នុងការរក្សាបាននូវសមត្ថភាពការពារខ្លួនឲ្យបានគ្រប់គ្រាន់”។

លោក Blinken ក៏បាននិយាយដែរថា “សហរដ្ឋអាមេរិកនឹងបន្តពង្រីកកិច្ចសហប្រតិបត្តិការជាមួយតៃវ៉ាន់លើផលប្រយោជន៍រួម និងគុណតម្លៃជាច្រើនរបស់ខ្លួន ព្រមទាំងគាំទ្រការចូលរួមដ៏មានអត្ថន័យរបស់តៃវ៉ាន់នៅក្នុងសហគមន៍អន្តរជាតិ ធ្វើឲ្យទំនាក់ទំនងសេដ្ឋកិច្ចកាន់តែស៊ីជម្រៅស្របតាមគោលនយោបាយចិនតែមួយរបស់យើងផងដែរ”។

លោក Blinken បន្តថា រដ្ឋបាលលោក Biden មិនស្វែងរកសង្រ្គាមត្រជាក់ជាមួយប្រទេសចិនទេ ប៉ុន្តែចង់ឲ្យទីក្រុងប៉េកាំង ប្រកាន់ខ្ជាប់នូវច្បាប់អន្តរជាតិ។ ទីក្រុង​វ៉ាស៊ីនតោន​មើល​ឃើញ​ទីក្រុង​ប៉េកាំង​ថា​ជា​បញ្ហា​ប្រឈម​រយៈពេល​វែង។

តាមសម្តីលោក Blinken, អាមេរិកមិនស្វែងរកជម្លោះ ឬសង្រ្គាមត្រជាក់ថ្មីឡើយ។ ផ្ទុយទៅវិញ អាមេរិកប្តេជ្ញាចិត្តដើម្បីចៀសវាងរឿងទាំងពីរនេះ។ ប៉ុន្តែអាមេរិក នឹងការពារ ហើយពង្រឹងច្បាប់អន្តរជាតិ កិច្ចព្រមព្រៀង គោលការណ៍ និងស្ថាប័នដែលរក្សាសន្តិភាព និងសន្តិសុខ ការពារសិទ្ធិបុគ្គល និងប្រជាជាតិអធិបតេយ្យ ហើយព្យាយាមធ្វើរឿងឲ្យប្រទេសទាំងអស់ រួមទាំងសហរដ្ឋអាមេរិក និងចិនផងដែរអាច រួមរស់ និងសហការគ្នា។

គួរបញ្ជាក់ថា អ្នកការទូតកំពូលរបស់សហរដ្ឋអាមេរិករូបនេះ បានប្រើសុន្ទរកថារបស់គាត់នៅសកលវិទ្យាល័យ George Washington ដើម្បីពន្យល់ពីគោលនយោបាយដែលមានស្រាប់ ជាជាងការបង្ហាញពីទិសដៅថ្មីដ៏រឹងមាំណាមួយចំពោះប្រទេសចិន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sputnik

ចុចអាន៖ លោក Biden ប្តេជ្ញាឆ្លើយតបផ្នែកយោធា បើ ចិន លុកលុយ តៃវ៉ាន់