រុស្ស៊ី ប្រាប់មូលហេតុមួយទៀតឈ្នះសង្គ្រាមលើ អ៊ុយក្រែន (មានវីដេអូ)

មន្ត្រីវិមានក្រឹមឡាំងដាក់ក្ដីសង្ឃឹមថា ប្រទេសរុស្ស៊ីនឹងឈ្នះសង្រ្គាមនៅចុងឆ្នាំនេះ នៅពេលបណ្តាប្រទេសលោកខាងលិចហត់នឿយ និងធុញទ្រាន់ក្នុងការគាំទ្រដល់ប្រទេសអ៊ុយក្រែន ។

ប្រភព​ជិត​ស្និទ្ធ​នឹង​វិមាន​ក្រឹមឡាំងចំនួន ២ ​បាន​ប្រាប់​សារព័ត៌មាន​ឯករាជ្យ​រុស្ស៊ី Meduza ថា​ “​មិនយូរមិនឆាប់ អឺរ៉ុបនឹងនឿយហត់ក្នុងការជួយទាំងទឹកប្រាក់ និងអាវុធទៅដល់ទីក្រុងកៀវ ហើយសង្គ្រាមទាំងមូលប្រហែលជានឹងបញ្ចប់នៅរដូវស្លឹកឈើជ្រុះឆ្នាំនេះ” ។

ប្រភពក៏បានព្យាករណ៍ដែរថា បណ្តាប្រទេសនៅអឺរ៉ុបនឹងត្រូវចរចាជាមួយរុស្ស៊ី នៅពេលរដូវរងាខិតចូលមកដល់ ដោយសារពួកគេពឹងផ្អែកលើថាមពលរបស់ទីក្រុងមូស្គូដើម្បីរក្សាកំដៅប្រជាជន ។

សារព័ត៌មាន Meduza បានរាយការណ៍ថា ក្នុងប៉ុន្មានថ្ងៃថ្មីៗនេះការវាយលុករបស់កងកម្លាំងប្រដាប់អាវុធរុស្ស៊ីលើតំបន់ Donbas ភាគខាងកើតរបស់អ៊ុយក្រែនកំពុងឈានទៅមុខជាលំដាប់ ហើយប្រសិនបើរុស្ស៊ីជោគជ័យក្នុងការកាន់កាប់ Donbas មែននោះ វានឹងជាសមិទ្ធិផលនយោបាយដ៏សំខាន់មួយរបស់វិមានក្រឹមឡាំងបង្ហាញដល់ប្រជាជនរុស្ស៊ីពីភាពត្រឹមត្រូវនៃសង្គ្រាមលុកលុយមួយនេះ” ។

គួរបញ្ជាក់ថា រុស្ស៊ីបានចាប់ផ្តើមប្រតិបត្តិការយោធាពិសេសកាលពីខែកុម្ភៈជាមួយនឹងគោលដៅបញ្ចប់ឧក្រិដ្ឋកម្មសង្គ្រាមដែលបានប្រព្រឹត្តដោយកងទ័ពអ៊ុយក្រែនប្រឆាំងនឹងជនស៊ីវិលក្នុងតំបន់ Donbass ខណៈលោកប្រធានាធិបតី វ្ល៉ាឌីមៀ ពូទីន បាននិយាយថា អស់រយៈពេល ៨ ឆ្នាំមកនេះប្រជាជននៅតំបន់ Donbass បានទទួលរងនូវអំពើប្រល័យពូជសាសន៍ដោយទីក្រុងកៀវ ៕

ប្រែសម្រួលដោយ ៖ ជីវ័ន្ត

ប្រភព ៖ Business Insider

ចុចអាន ៖ អឺរ៉ុប ប្រាប់មូលហេតុដែលនៅតែបន្តទិញប្រេងពី រុស្ស៊ី