លីទុយអានី រិះគន់បណ្តាប្រទេសខ្លះ​ក្នុងអឺរ៉ុប ខ្វះការសាមគ្គី ដែលមិនព្រមបង្កើនកញ្ចប់ថវិកាជួយ អ៊ុយក្រែន និង ណាតូ

នៅក្នុងបទសម្ភាសន៍មួយជាមួយទីភ្នាក់ងារសារព័ត៌មាន AFP នៅក្នុងទីក្រុង Vilnius កាលពីថ្ងៃព្រហស្បតិ៍ទី១៤ ខែឧសភា រដ្ឋមន្ត្រីការបរទេសលីទុយអានី លោក Kestutis Budrys បានរិះគន់ចំៗដល់បណ្តាប្រទេស​មួយចំនួន​នៅអឺរ៉ុប ដែលមិនបានចំណាយថវិកាឲ្យបានគ្រប់គ្រាន់ ដើម្បីគាំទ្រ​អ៊ុយក្រែន និងពង្រឹងអង្គការណាតូ។

លោក រដ្ឋមន្ត្រី បាននិយាយថា «ខ្ញុំមិនឃើញមានផ្លូវណាផ្សេង ក្រៅពីការដើរទៅមុខជាមួយនឹងទំនាក់ទំនង​ក្នុង​អង្គការ​ណាតូ​ដ៏រឹងមាំ ដើម្បីបង្ហាញថា យើងមានសាមគ្គីភាពគ្នានោះទេ»។ លោកបានបន្ថែមដោយសំដៅទៅលើបណ្តាប្រទេសនៅតំបន់អឺរ៉ុបខាងត្បូង តែមិនបានបញ្ជាក់ឈ្មោះប្រទេសណាមួយចំៗឡើយ ថា «យើងឃើញថា មិនមែនគ្រប់ប្រទេសទាំងអស់នៅអឺរ៉ុប សុទ្ធតែបានយកចិត្តទុកដាក់ខ្ពស់ចំពោះការទទួលខុសត្រូវមួយនេះនោះឡើយ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថិតនៅខ្សែត្រៀមជួរមុខភាគខាងកើតរបស់ណាតូ ប្រទេសលីទុយអានីបានក្លាយជាសម្ព័ន្ធមិត្តដ៏ជិតស្និទ្ធបំផុតមួយរបស់អ៊ុយក្រែន ចាប់តាំងពីការចាប់ផ្តើមនៃការឈ្លានពានទ្រង់ទ្រាយធំពីសំណាក់រុស្ស៊ីក្នុងឆ្នាំ២០២២។ ប្រទេសដែនកោះបាល់ទិក ដែលធ្លាប់ស្ថិតក្រោមការគ្រប់គ្រងរបស់សហភាពសូវៀតមួយនេះ បានវិនិយោគរហូតដល់ទៅ ៥.៤ ភាគរយនៃផលិតផលក្នុងស្រុកសរុប (GDP) របស់ខ្លួនទៅលើវិស័យការពារជាតិ ដែលជាកម្រិតមួយខ្ពស់ជាងគោលដៅ ៥ ភាគរយរបស់ណាតូសម្រាប់ប្រទេសជាសមាជិកដែលត្រូវសម្រេចឲ្យបានត្រឹមឆ្នាំ២០៣៥។

លោក Budrys បានថ្លែងថា៖ «កញ្ចប់ថវិកាដែលយើងកំពុងចំណាយនេះ គឺមានទំហំធំបំផុតនៅក្នុងចំណោមសមាជិកអង្គការណាតូទាំងអស់ និងនៅក្នុងពិភពលោកសេរីទាំងមូល»។

កាលពីដើមសប្តាហ៍នេះ មេបញ្ជាការកំពូលរបស់ណាតូ គឺឧត្តមសេនីយ៍ Alexus Grynkewich នៃកងទ័ពអាកាសអាមេរិក បានកោតសរសើរប្រទេសលីទុយអានីថា ជា «គំរូដ៏អស្ចារ្យមួយដែលគួររៀនសូត្រតាម» ជុំវិញការរួមចំណែកលើវិស័យការពារជាតិ។

លីទុយអានីបានប្តេជ្ញាចិត្តយ៉ាងមុតមាំចំពោះកិច្ចការពារជាតិទូទាំងអឺរ៉ុប ដោយបានក្លាយជាប្រទេសទីពីរបន្ទាប់ពីប៉ូឡូញ ក្នុងការចុះហត្ថលេខាលើកម្មវិធីកម្ចីរបស់អឺរ៉ុប ដោយបែងចែកថវិកាជាង៦.៣ ពាន់លានអឺរ៉ូ (៧.៣៥ ពាន់លានដុល្លារ) ទៅឲ្យវិស័យយោធារបស់ខ្លួន និងបានអនុញ្ញាតឲ្យមានការដាក់ពង្រាយកងពលតូចនៃកងទ័ពអាល្លឺម៉ង់ចំនួន ៤,៨០០ នាក់ជាអចិន្ត្រៃយ៍នៅលើទឹកដីរបស់ខ្លួន។

ទោះជាយ៉ាងណាក៏ដោយ លោក Budrys បានសង្កត់ធ្ងន់ថា សកម្មភាពទាំងនេះមិនអាចជំនួសឲ្យសម្ព័ន្ធភាពឆ្លងមហាសមុទ្រអាត្លង់ទិកបានឡើយ។ វិធានការសន្តិសុខរបស់អឺរ៉ុបគឺ «ជាធាតុផ្សំដ៏សំខាន់មួយក្នុងការបំពេញបន្ថែមឲ្យអង្គការណាតូ ប៉ុន្តែមិនមែនជាការមកជំនួសណាតូនោះទេ»៕

អត្ថបទ៖ សាង ស្រីល័ក្ខ

២៦ ប្រទេស ចេញមុខគាំទ្រឲ្យ​បើកច្រក Hormuz ឡើងវិញ និងត្រៀមប្រើកម្លាំងបោសសម្អាតមីន