ព័ត៌មានអន្ដរជាតិ

រុស្ស៊ីព្រមានអាមេរិកពីការប្រឈមមុខគ្នាផ្ទាល់ពីការផ្តល់ប្រព័ន្ធរ៉ុកកែតទំនើបទៅអ៊ុយក្រែន

បានផុស

៤ years មុន

នៅ

ថ្ងៃព្រហស្បតិ៍ ២ មិថុនា ២០២២

ដោយ

កាលពីថ្ងៃទី១ ខែមិថុនា ម្សិលមិញ ប្រទេសរុស្ស៊ីបានធ្វើការរិះគន់យ៉ាងចាស់ដៃចំពោះការសម្រេចចិត្តរបស់សហរដ្ឋអាមេរិកក្នុងការផ្តល់ប្រព័ន្ធរ៉ុក្កែតទំនើប និងគ្រាប់រំសេវដល់ប្រទេសអ៊ុយក្រែន ដោយបានព្រមានពីហានិភ័យកើនឡើងនៃការប្រឈមមុខគ្នាផ្ទាល់រវាងប្រទេសមហាអំណាចទាំងពីរ។

អនុរដ្ឋមន្ត្រីក្រសួងការបរទេសរុស្ស៊ី លោក Sergei Ryabkov បានប្រាប់ទីភ្នាក់ងារសារព័ត៌មានរដ្ឋ RIA Novosti ថា រដ្ឋាភិបាលទីក្រុងមូស្គូយល់ឃើញថា ការផ្តល់ជំនួយយោធារបស់អាមេរិកទៅអ៊ុយក្រែនគឺអវិជ្ជមានយ៉ាងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានចង្អុលបង្ហាញថា ប្រព័ន្ធរ៉ុក្កែតកាំភ្លើងធំចល័តកម្រិតខ្ពស់ (HIMARS) ដែលជាវុធរ៉ុក្កែតបាញ់ច្រើនគ្រាប់អាចវាយប្រហារលើគោលដៅច្បាស់លាស់ក្នុងរយៈចម្ងាយឆ្ងាយបានយ៉ាងល្អ។

រដ្ឋាភិបាលទីក្រុងវ៉ាស៊ីនតោនបាននិយាយថា ខ្លួននឹងបញ្ចូលប្រព័ន្ធទៅក្នុងកញ្ចប់ជំនួយយោធាដែលមានតម្លៃ៧០០លានដុល្លារអាមេរិកដែលត្រូវបានរំពឹងនឹងបញ្ចេញនាថ្ងៃពុធ។ មន្ត្រីរដ្ឋបាលជាន់ខ្ពស់បាននិយាយថា អ៊ុយក្រែនបានធានាថា មីស៊ីល HIMARS នឹងមិនត្រូវបានប្រើប្រឆាំងលើគោលដៅក្នុងទឹកដីរុស្ស៊ីឡើយ។

លោកប្រធានាធិបតីអាមេរិក ចូ បៃដិន បានសរសេរក្នុងអត្ថបទទស្សនៈមួយនៅក្នុងកាសែត New York Times ថា ៖«យើងបានសម្រេចចិត្តយ៉ាងឆាប់ដើម្បីបញ្ជូនសព្វាវុធ និងគ្រាប់រំសេវជាក់លាក់មួយចំនួនទៅអ៊ុយក្រែន ដូច្នេះនោះខ្លួនអាចប្រយុទ្ធនៅសមរភូមិ និងស្ថិតលើគោលជំហរដ៏រឹងមាំបំផុតដែលអាចស្ថិតនៅលើតុចរចា»។

នៅពេលសួរអំពីទិដ្ឋភាពនៃការប្រឈមមុខគ្នាផ្ទាល់រវាងអាមេរិក និងរុស្ស៊ី លោក Ryabkov បាននិយាយថា ៖«រាល់ការនាំចេញអាវុធណាមួយដែលចេះតែបន្ត នោះគឺជាការកើនឡើង។ ការកើនឡើងគឺជាការវិវត្តហានិភ័យ»។

លោកបានបន្ទោសរដ្ឋាភិបាលទីក្រុងវ៉ាស៊ីនតោនចំពោះការបង្កើនអរិភាពនៅប្រទេសអ៊ុយក្រែនដោយបាននិយាយថា ៖«អាមេរិកមិនបានធ្វើអ្វីដើម្បីជាប្រយោជន៍ដល់ការស្វែងរកដំណោះស្រាយឡើយ។ វាច្បាស់ណាស់ ដូចទៅនឹងរយៈពេលជាច្រើនឆ្នាំ មុនពេលការចាប់ផ្តើមប្រតិបត្តិការយោធាពិសេស»៕

ប្រែសម្រួល៖ វីរបុត្រ
ប្រភព៖ Reuters