កូរ៉េខាងជើង បន្ថែមភារកិច្ចដល់អង្គភាពយោធាជួរមុខ ពិសេសប្រតិបត្តិការ មីស៊ីលបំពាក់ក្បាលគ្រាប់នុយក្លេអ៊ែរ

កាសែត Rodong Sinmun បានរាយការណ៍នៅថ្ងៃព្រហស្បតិ៍នេះថា កិច្ចប្រជុំថ្ងៃទីពីររបស់គណបក្សកាន់អំណាចកូរ៉េខាងជើងបានពិភាក្សាអំពីការផ្ដល់ភារកិច្ចបន្ថែមដល់អង្គភាពជួរមុខ ជាពិសេសកាតព្វកិច្ចសំដៅទៅលើប្រតិបត្តិការពាក់ព័ន្ធនឹងមីស៊ីលរយៈចម្ងាយខ្លីបំពាក់ដោយក្បាលគ្រាប់នុយក្លេអ៊ែរ ។

ប្រព័ន្ធផ្សព្វផ្សាយកូរ៉េខាងជើងនិយាយថា ថ្ងៃទីពីរនៃកិច្ចប្រជុំកំពូលរបស់គណៈកម្មាធិការយោធាកណ្តាលត្រូវបានធ្វើឡើងកាលពីថ្ងៃពុធ ហើយក៏មានការចូលរួមពីមេដឹកនាំលោក គីម ជុងអ៊ុន ផងដែរ ។

លោក គីម បាននិយាយថា អ្នកចូលរួមក្នុងអង្គប្រជុំក៏បានពិភាក្សាអំពីបញ្ហាទាក់ទងនឹងការរៀបចំឡើងវិញនូវទម្រង់យោធាសំខាន់ៗជាច្រើន ពោលផ្ដោតលើភារកិច្ចបន្ថែមដល់អង្គភាពយោធាជួរមុខ ។

ទន្ទឹមនោះ ក្រុមអ្នកសង្កេតការណ៍ក៏កំពុងរង់ចាំមើលថាតើ គោលនយោបាយជាក់ស្តែងនឹងត្រូវបានបង្ហាញទាក់ទងនឹងកម្មវិធីអភិវឌ្ឍន៍នុយក្លេអ៊ែរ និងកាំជ្រួចមីស៊ីលល្បឿនលឿនរបស់កូរ៉េខាងជើងក្នុងថ្ងៃទី ៣ នៃកិច្ចប្រជុំនៅថ្ងៃព្រហស្បតិ៍នេះដែរឬទេ ។

ស្របពេលជាមួយគ្នានេះ វាក៏កើត​ឡើង​ ចំពេល​មាន​ការ​ព្រួយ​បារម្ភ​ថា ក្រុង​ព្យុងយ៉ាង​អាច​នឹង​ធ្វើ​ការ​សាកល្បង​នុយក្លេអ៊ែរ​លើក​ទី​ ៧ ​ក្នុង​ពេល​ឆាប់ៗនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កម្រណាស់! លោក គីម ជុងអ៊ុន ស្រក់ទឹកភ្នែក ពេលមើលរូបសេនាប្រមុខ ដែលស្លាប់ទៅ